پیڈا ویب سائٹ پر کسانوں کی سہولت کیلئے اردو میں معلومات مہیا کی جائیں گی، وزیر آبپاشی

لاہور۔23 فروری(اُردو پوائنٹ اخبارتازہ ترین - اے پی پی۔ 23 فروری2017ء)صوبائی وزیر آبپاشی و چیئرمین پیڈا امانت اللہ خان شادی خیل نے ہدایت کی ہے کہ کسان برادری کی رہنمائی کیلئے ضروری معلومات اردو زبان میں محکمانہ ویب سائٹ پر اپ لوڈ کی جائیں،انہوں نے جنرل مینجر پیڈا کی سربراہی میں خصوصی کمیٹی قائم کر دی ہے، یہ کمیٹی ضروری معلومات کا آسان اردو میں ترجمہ کریگی،وہ اپنے دفتر میں کسانوں کی نہری نظام میں عملی شمولیت کے حوالہ سے منعقدہ اجلاس کی صدارت کر رہے تھے، اجلاس میں جنرل مینجر پیڈا محمد اجمل میاں ، ڈپٹی جنرل مینجر (سوشل موبلائزیشن) سید شائق حسین عابدی اور ڈپٹی جنرل مینجر (فنانس) ناصر اقبال کے علاوہ دیگر افسران بھی شریک تھے، اجلاس میں صوبائی وزیر کو ادارہ جاتی اصلاحات پروگرام کے تحت جاری سرگرمیوں کے بارے میں بریف کیا گیا، اس موقع پرصوبائی وزیر آبپاشی امانت اللہ شادی خیل نے کہا کہ کسان برادری زرعی معیشت میں کلیدی کردار کی حامل ہے، اس حوالے سے یہ بات اشد ضروری ہے کہ کسانوں کو زرعی و نہری شعبہ کے بارے میں ضروری معلومات بروقت مہیا کی جائیں،اس کے ساتھ ساتھ انہیں ضروری قوانین سے بھی باخبر رکھا جائیگا،اس طرح کسان زیادہ فعال انداز سے زرعی پیدا وار کے اضافہ میں اپنا کردار ادا کر سکتا ہے، اس تناظر میں پیڈا کی ہمیشہ یہ کوشش رہی ہے کہ کسان تنظیموں کی کپیسٹی بلڈنگ کے ساتھ ساتھ کسانوں کو ضروری معلومات باقاعدگی سے مہیا کی جائیں،انہوں نے امید ظاہر کی کہ پیڈا کی آفیشل ویب سائٹ کے ذریعے کسانوں کو آگاہی کا عمل مزید مہمیز پکڑے گا اور اردو زبان میں ضروری معلومات ملنے سے کسان نہری شعبہ کی اصلاحات کی کامیابی میں مزید موثر کردار ادا کر سکے گا۔