بھارت میں جنسی زیادتی کا ایک اور دل دہلا دینے والا واقعہ سامنے آگیا

لکھنئو(اُردو پوائنٹ اخبارتازہ ترین - آئی این پی۔ 07 مئی2017ء) بھارت میں جنسی زیادتی کا ایک اور دل دہلا دینے والا واقعہ سامنے آگیا، ریاست اترپردیش میں 8افراد نے مبینہ طور پر شادی شدہ خاتون کو اس کے شوہر کے سامنے گاڑی میں جنسی زیادتی کا نشانہ بنا ڈالا۔بھارتی میڈیا کے مطابق ریاست اترپردیش کے ضلع جالون میں 8ملزمان نے شوہر کو باندھ کر مبینہ طورپر گاڑی کے اندر خاتون کو گینگ ریپ کا نشانہ بنایا اور لوٹ مار کر کے فرار ہو گئے ۔

(جاری ہے)

پولیس حکام کا کہنا ہے کہ میاں بیوی اپنے گھر سے دستکاری کا کام کرنے کیلئے جے پور جا رہے تھے کہ راستے میں لوڈر کے ڈرائیور نے انہیں لفٹ کی پیشکش کی اور پھر کچھ فاصلے پر ایک شراب خانے پر جا کر کھڑی کر دی جہاں سے مزید افراد گاڑی میں سوار ہو ئے ۔پولیس کاکہنا ہے کہ ڈرائیور نے اس کے بعد گاڑی کو ایک ویران مقام پر کھڑا کر دیا جہاں 8ملزمان نے شوہر کو رسیوں کی مدد سے باندھ کر خاتون کے ساتھ باری باری جنسی بدفعلی کی اور موبائل فون ، نقدی اور دیگر سامان لوٹ کر فرار ہو گئے۔پولیس کا کہنا ہے کہ واقعے کا مقدمہ درج کرکے ملزمان کی تلاش شرو ع کردی گئی ہے ۔