شیخ رشید پر حملہ کرنے والے شخص کے خلاف تھانہ سیکرٹریٹ میں مقدمہ درج‘ ملزم گرفتار

جمعرات 8 جون 2017 23:38

اسلام آباد ۔ (اُردو پوائنٹ اخبارتازہ ترین - اے پی پی۔ 08 جون2017ء) عوامی مسلم لیگ کے سربراہ شیخ رشید نے پارلیمنٹ میں اپنے اوپر حملہ کرنے والے شخص کے خلاف تھانہ سیکرٹریٹ میں ایف آئی آر کے اندارج کیلئے درخواست جمع کرادی جس پر پولیس نے دفعہ 506 اور 25 D ٹیلی گراف ایکٹ کے تحت مقدمہ درج کرکے ملزم کو گرفتار کر لیا۔

(جاری ہے)

تفصیلات کے مطابق جمعرات کی سہہ پہر عوامی مسلم لیگ کے سربراہ شیخ رشید جب اسمبلی اجلاس میں شرکت کیلئے آئے تو ایک شخص ملک نور اعوان نے ان کا راستہ روکتے ہوئے بازو سے پکڑ لیا اور کہا کہ میرے 22 لاکھ روپے ادا کرو جس پر شیخ رشید نے اس کو منع کیا تو دونوں کے درمیان تلخی ہوگئی۔

تھانہ سیکرٹریٹ پولیس نے ملزم ملک نور کو گرفتار کرکے اس کے خلاف دفعہ 506 اور 25D ٹیلی گراف ایکٹ کے تحت مقدمہ درج کر لیا۔ مزید تحقیقات جاری ہیں۔ ایس ایچ او تھانہ سیکٹریٹ کے مطابق عوامی مسلم لیگ کے سربراہ شیخ رشید کی طرف سے درخواست موصول ہوتے ہی باقاعدہ ایف آئی آر کا اندراج کر لیا گیا اور ملزم کو گرفتار کر لیا۔ انہوں نے بتایا کہ اس معاملہ کی باقاعدہ تحقیقات کا آغاز کر دیا گیا ہے۔