سعودی عرب میں غیر ملکی مزدوروں کے گھر میں آگ لگنے سے 11 افراد ہلاک ،ْچھ افراد زخمی

بدھ 12 جولائی 2017 23:43

ریاض(اُردو پوائنٹ اخبارتازہ ترین - این این آئی۔ 12 جولائی2017ء) سعودی عرب میں غیر ملکی مزدوروں کے گھر میں آگ لگنے سے 11 افراد ہلاک اور 6 زخمی ہو گئے۔غیر ملکی میڈیا کے مطابق واقعہ سعودی صوبے نجران میں پیش آیا جہاں ایک گھر میں آگ لگ گئی اور اس گھر میں موجود 11 افراد دم گھٹنے سے ہلاک ہو گئے ،ْ دیگر 6 افراد زخمی ہو گئے۔

(جاری ہے)

صوبے کے محکمہ سول ڈیفنس کی جانب سے جاری بیان کے مطابق فائرفائٹرز آگ پر قابو پانے کیلئے جائے حادثہ پر پہنچے تو انہیں معلوم ہوا کہ گھر میں وینٹی لیشن کا کوئی انتظام نہیں اور ایک بھی کھڑکی موجود نہیں تھی جس سے دھواں باہر نکلتا۔

سول ڈیفنس کے مطابق اس گھر میں رہنے والے تمام افراد غیر ملکی تھے جو محنت مزدوری کے لیے سعودی عرب میں مقیم تھے۔ ہلاک و زخمی ہونے والے تمام افراد کا تعلق بھارت اور بنگلہ دیش سے بتایا گیا ہے۔ علاوہ ازیں تبوک کے علاقے میں بھی 10 ہزار اسکوائر میٹر کے رقبے پر محیط کھیت میں آگ لگنے کا واقعہ پیش آیا تاہم اس واقعے میں کسی جانی نقصان کی اطلاع موصول نہیں ہوئی۔