کراچی، اسٹیل ٹائون میں پولیس کی کارروائی،

فائرنگ کے تبادلے میں دو اغواء کارہلاک

منگل 12 ستمبر 2017 14:59

کراچی(اُردو پوائنٹ اخبارتازہ ترین - این این آئی۔ 12 ستمبر2017ء) کراچی کے علاقے اسٹیل ٹائون میں اے وی سی سی پولیس اور اغواء کاروں میں مقابلے کے دوران دو ملزمان ہلاک ہو گئے۔ پانچ روز قبل بازیاب ہونے والے تاجر کی گاڑی بھی ہلاک ملزمان کے قبضے سے برآمد کر لی گئی ہے۔تفصیلات کے مطابق اسٹیل ٹائون کے علاقے میں اے وی سی سی پولیس اور اغواء کاروں کے درمیان مقابلہ ہوا۔

اس دوران دو اغوا کار پولیس کی فائرنگ سے ہلاک ہو گئے، جن کی شناخت عبدالمالک عرف حاجی اور حیدر علی عرف راجو کے نام سے کی گئی ہے۔

(جاری ہے)

ہلاک ملزمان کے قبضے سے دو ٹی ٹی پستول اور ایک سفید رنگ کی کار ملی ہے۔ ایس ایس پی اے وی سی سی عبداللہ احمد نے بتایا کہ بہادرآباد کے علاقے سے اغوا ہونے والے تاجر مسعود فیروز کو گزشتہ جمعرات سہراب گوٹھ سے دو اغواکاروں کو ہلاک جبکہ دو کی گرفتاری کے بعد بازیاب کرا لیا گیا تھا۔ تاہم بازیاب تاجر کی گاڑی مارے جانیوالے اغوا کار کے فرار ساتھیوں کے زیر استعمال تھی۔ گرفتار عبد المالک کی نشاندہی پر اے وی سی سی کی ٹیم نے کارروائی کی۔ملزمان نے پولیس کودیکھتے ہی فائرنگ کردی جوابی فائرنگ سے دوملزمان مارے گئے۔