امریکا یا کسی اور ملک کی جانب سے جارحیت کا بھرپور جواب دیا جائے گا‘ پاکستان میں چین کے فوجی اڈے بنانے کا کوئی منصوبہ زیرغور نہیں-ترجمان دفترخارجہ

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔04 جنوری۔2018ء) پاکستان نے کہا ہے کہ امریکا یا کسی اور ملک کی جانب سے جارحیت کا بھرپور جواب دیا جائے گا- ڈرون کو مارگرانے کی صلاحیت رکھتے ہیں۔ ترجمان دفتر خارجہ ڈاکٹر فیصل نے دفترخارجہ اسلام آباد میں ہفتہ وار پریس بریفنگ کے کہا کہ دہشت گردی کے خلاف پاکستان کی قربانیاں ڈھکی چھپی نہیں، پاکستان نے امریکی صدر کے ٹویٹ پر امریکی سفیر کو طلب کرکے احتجاج ریکارڈ کرایا ہے۔

امریکی امداد کی بندش سے متعلق ڈاکٹرمحمد فیصل نے کہا کہ ہماری خارجہ پالیسی کا تعین اقتصادی پالیسی کے تحت نہیں کیا جاتا، زندہ قومیں چیلنجز کا مقابلہ خندہ پیشانی سے کرتی ہیں،امریکا کی جانب سے امداد کی فراہمی پر تفصیلی ریکارڈ جاری کیا جائے گا۔

(جاری ہے)

ممکنہ امریکی ڈرون حملے کے حوالے سے سوال پرترجمان دفترخارجہ نے کہا کہ آئی ایس پی آرسے واضح بیان آچکا ہے کہ ڈرون حملہ ہوا تو موثر جواب دیا جائے گا۔

ترجمان دفتر خارجہ نے کہا کہ پاکستان میں چین کے فوجی اڈے بنانے کا کوئی منصوبہ زیرغور نہیں اور نا ہی گوادر یا اس کے نواحی علاقوں میں فوجی اڈے بنانے سے متعلق چین کی کوئی درخواست ملی ہے، چند عناصرکی جانب سے اس ترقیاتی منصوبے پرافواہیں پھیلائی جارہی ہیں۔ایران میں جاری مظاہروں پر ترجمان دفتر خارجہ نے کہا کہ ایران ہمارا برادر اسلامی ملک ہے، مظاہرے ایران کا اندرونی معاملہ ہے، امید ہے تہران حکومت پرامن طریقے سے مظاہروں پر قابو پالے گی۔ انہوں نے کہا کہ بھارت نے حضرت خواجہ معین الدینؒ کے عرس میں شرکت کے لیے پاکستانیوں کو ویزے جاری نہیں کئے اس کے علاوہ بھارت نے ورلڈ کپ کیلئے اپنی قومی بلائنڈ کرکٹ ٹیم کونہیں آنے دیا جو کہ افسوسناک ہے۔