پنجاب میں ہفتہ صحت 19سے 24فروری تک منایا جائے گا

فیصل آباد 16 ۔ فروری (اُردو پوائنٹ اخبارتازہ ترین - اے پی پی۔ 16 فروری2018ء) پنجاب بھر میں 6روزہ ہفتہ صحت 19سے 24فروری تک منایا جائے گا جبکہ اس ہفتہ کے دوران ہیپا ٹائٹس بی و سی ،ٹی بی ٹیسٹ اور حاملہ خواتین کا طبی معائنہ کیا جائے گا نیز خواتین کو حفاظتی ٹیکے بھی مفت لگائے جائیں گے جس کیلئے تمام اقدامات مکمل کر لئے گئے ہیں اور موئثر تشہیری مہم کا بھی آغاز کر دیا گیا ہے تاکہ زیادہ سے زیادہ خواتین کو اس ہفتہ سے استفادہ کرنے کی ترغیب دی جا سکے۔

دوسری جانب الائیڈ ہسپتال فیصل آباد کے میڈیکل سپرنٹنڈنٹ ڈاکٹر خرم الطاف نے بتایا کہ حکومت پنجاب کی ہدایات پر دیگر ہسپتالوں کی طرح الائیڈ ہسپتال فیصل آباد میں بھی چھ روزہ ہفتہ صحت 19 سے 24 فروری تک منایا جائے گا جس میں روزانہ ایک ہزار سے زائد ہیپاٹائٹس بی سی ‘ ٹی بی کے ٹیسٹ اور حاملہ خواتین کا طبی معائنہ کیا جائے گا ۔

(جاری ہے)

انہوں نے بتایا کہ ہفتہ صحت کے دوران مریضوں کے چیک اپ کیلئے 10 خصوصی ڈیسک قائم کئے جائیں گے اور ہسپتال کے مجموعی طور پر 75 ڈاکٹرز و پیرا میڈیکل سٹاف کو ڈیوٹیاں تفویض کردی گئی ہیں جبکہ ڈپٹی میڈیکل سپرنٹنڈنٹ میاں فہیم یوسف کو فوکل پرسن مقرر کیا گیا ہے ۔

انہوں نے بتایا کہ ڈیسک نمبر ون پر مریضوں کی معلومات اور رہنمائی کیلئے ہسپتال کا عملہ موجود ہو گا جبکہ دوسرے ڈیسک پر ٹوکن ‘ تیسرے کائونٹرز پر مریضوں کا کمپیوٹرائزڈ اندراج ‘ چوتھے ڈیسک پر مریضوں کے بلڈ پریشر ‘ وزن ‘ قد اور بخار چیک کرنے کیلئے سٹاف موجود ہو گا اسی طرح پانچواں ڈیسک مریضوں کے فری شوگر ‘ ہیپاٹائٹس بی اور سی کے ٹیسٹ کیلئے مختص کیا گیا ہے ۔

انہوں نے بتایاکہ چھٹے کائونٹر پر حفاظتی ٹیکے اور حاملہ خواتین کا چیک اپ ‘ ساتویں کائونٹر پر ڈاکٹر مریضوں کا طبی معائنہ اور مفت مشورے دیں گے ۔ انہوںنے بتایاکہ اسی طرح آٹھواں کائونٹر مریضوں کے ٹی بی ٹیسٹ کیلئے ‘ نویں ڈیسک پر 15 سے 45 سال تک خواتین اورحاملہ خواتین کا معائنہ اور الٹرا سائونڈ کیا جائے گا۔ انہوں نے بتایا کہ دسویں ڈیسک پر پیٹ کے کیڑے ختم کرنے اور فولک ایسڈ و فولاد کی ادویات مفت فراہم کی جائیں گی ۔انہوںنے حاملہ خواتین سے اپیل کی کہ وہ بھر پور انداز سے اس سہولت سے استفادہ کریں۔