پوری قوم عدلیہ کی پشت پر کھڑی ہے ،دبائو میں لانے کے ہتھکنڈوں کیخلاف بھرپور مزاحمت کی جائیگی‘ جمشید چیمہ

عوام کو دو وقت کی روٹی کے لالے پڑے ہوئے ہیں جبکہ حکمران جھوٹی ترقی کے دعوے کرتے نہیں تھکتے ‘ سینئر نائب صدر

پیر 16 اپریل 2018 12:36

لاہور(اُردو پوائنٹ اخبارتازہ ترین۔ 16 اپریل2018ء) تحریک انصاف پنجاب کے سینئر نائب صدر جمشید اقبال چیمہ نے کہا ہے کہ پوری قوم عدلیہ کی پشت پر کھڑی ہے اوراسے دبائو میں لانے کیلئے اوچھے ہتھکنڈوں اور حربوں کیخلاف بھرپور مزاحمت کی جائے گی ،ریاستی ادارے کسی بھی معاشرے کی مضبوط بنیاد ہوتے ہیں لیکن بد قسمتی سے یہاں پر حکومت میںآنے والوں نے اپنے ذاتی مفادات کیلئے انہیں کھوکھلا کیا ۔

ان خیالات کا اظہار انہوں نے حلقہ این اے 136کی یونین کونسل 267کے دورہ کے موقع پر خطاب کرتے ہوئے کیا ۔

(جاری ہے)

جمشید اقبال چیمہ نے کہا کہ کرپشن ہمارے ملک کا سب سے بڑا مسئلہ ہے اسی لئے تحریک انصاف عمران خان کی قیادت میں اس ناسور کو جڑ سے اکھاڑ پھینکنے کیلئے مسلسل جدوجہد جاری رکھے ہوئے ہے ۔ انہوںنے کہا کہ آج عوام کو دو وقت کی روٹی کے لالے پڑے ہوئے ہیں جبکہ حکمران جھوٹی ترقی کے دعوئوں کے ذریعے عوام کی آنکھوں میں دھول جھونک رہے ہیں ۔ آئندہ عام انتخابات ملک کی سمت کا تعین کرنے کا سنہری موقع ہے اور اگر اب بھی ووٹ کے ذریعے درست فیصلہ نہ کیا گیا تو ہماری آنے والی نسلیں بھی حکمرانوں کی محتاج رہیں گی اور انہیں تعلیم اور صحت سمیت زندگی کی بنیادی سہولیات کی فراہمی خواب ہی رہے گا۔