سعودی محکمہ موسمیات گرج چمک کے ساتھ بارش، تیز ہوائوں اور ژالہ باری کی پیش گوئی

بدھ 18 اپریل 2018 14:53

طائف ۔ (اُردو پوائنٹ اخبارتازہ ترین - اے پی پی۔ 18 اپریل2018ء) سعودی عرب کے محکمہ موسمیات نے خبردار کیا ہے کہ گرج چمک کے ساتھ طائف ، الہدا، الشفاء اور آس پاس کے مقامات پر بارش ہوگی اور تیز ہوائیں چلیں گی اس کے علاوہ ژالہ باری بھی متوقع ہے۔ طائف میں شہری دفاع کے ترجمان کرنل ناصر الشریف نے مقامی شہریوں اور تارکین وطن کو مشورہ دیا ہے کہ وہ احتیاطی تدابیر اپنائیں۔

(جاری ہے)

وادیوں اور برساتی نالو ں سے گزرنے سے پرہیز کریں۔موسمیات کے بعض ماہرین کا کہنا ہے کہ ان دنوں مملکت کے متعدد علاقوں میں جاری گرد وغبار کا طوفان ہفتے کے اختتام پر تاریخی بارشوں کے بعد چھٹ جائے گا۔ کئی مقامات پر موسلادھار بارش ہو گی اور ممکن ہے خطرناک قسم کے سیلاب کی صورت اختیار کرلے۔انھوں نے کہا کہ قصیم اورریاض کے علاقے گردوغبار کی زد میں ہیں۔