ملک بھر میں شدید گرمی کی لہر کا خدشہ، درجہ حرارت 50 ڈگری تک جانے کا امکان

بدھ 6 مئی 2026 22:11

اسلام آباد(اُردو پوائنٹ اخبارتازہ ترین - آن لائن۔ 06 مئی2026ء) محکمہ موسمیات پاکستان نے ملک کے بیشتر علاقوں میں 7 سے 11 مئی کے دوران شدید گرمی کی لہر (ہیٹ ویو) کی پیشگوئی جاری کر دی ہے۔محکمہ موسمیات کے مطابق جنوبی پنجاب، سندھ اور بلوچستان میں درجہ حرارت 46 سے 50 ڈگری سینٹی گریڈ تک پہنچنے کا امکان ہے۔ بالائی علاقوں میں بھی گرمی کی شدت برقرار رہے گی جہاں درجہ حرارت 43 سے 47 ڈگری سینٹی گریڈ تک رہنے کی توقع ہے۔

8 سے 10 مئی کے دوران میدانی علاقوں میں گرد آلود ہوائیں چلنے کا امکان بھی ظاہر کیا گیا ہے جس سے حدِ نگاہ اور معمولات زندگی متاثر ہو سکتے ہیں۔ہیٹ ویو کے پیش نظر شہریوں کو غیر ضروری طور پر دھوپ میں نکلنے سے گریز کرنے کی ہدایت کی گئی ہے۔ خاص طور پر بچوں، خواتین اور بزرگوں کو احتیاط برتنے کا مشورہ دیا گیا ہے۔

(جاری ہے)

محکمہ موسمیات نے کسانوں کو بھی موسمی حالات کے مطابق فصلوں کی مناسب دیکھ بھال کی ہدایت جاری کی ہے۔

رپورٹ کے مطابق 10 مئی کی شام یا رات سے مغربی ہواؤں کا سسٹم داخل ہونے کا امکان ہے، جس کے نتیجے میں بالائی علاقوں میں موسم تبدیل ہو سکتا ہے۔ 13 مئی تک ان علاقوں میں بارش اور موسم کی بہتری کی پیشگوئی کی گئی ہے۔محکمہ موسمیات نے شہریوں کو ہدایت کی ہے کہ شدید گرمی کے دوران پانی کا زیادہ استعمال کریں اور دھوپ سے بچاؤ کے لیے احتیاطی تدابیر پر عمل کریں تاکہ صحت کے مسائل سے محفوظ رہا جا سکے۔