خیرپور سے کراچی جاتے ہوئے دو کلاء رہنمائوں کے اچانک لاپتہ ہونے پر وکلاء نے عدالتوں کا بائیکاٹ کیا

بدھ 18 اپریل 2018 22:47

حیدرآباد(اُردو پوائنٹ اخبارتازہ ترین - این این آئی۔ 18 اپریل2018ء) خیرپور سے کراچی جاتے ہوئے دو کلاء رہنمائوں کے اچانک لاپتہ ہونے پر بدھ کو حیدرآباد کے وکلاء نے عدالتوں کا بائیکاٹ کیا جس کے باعث سیکڑوں سائلین کو مشکلات کا سامنا کرنا پڑا۔

(جاری ہے)

ڈسٹرکٹ بار خیرپور کے سابق جنرل سیکریٹری سید جعفر شاہ اپنے ایک ساتھی وکیل عمران پٹھان کے ساتھ کراچی سے خیرپور جا رہے تھے کہ اچانک لاپتہ ہو گئے ان کی گاڑی کنڈیارو تھانہ کی حدود سے لاوارث حالت میں کھڑی پائی گئی تھی، اس واقعہ کے خلاف حیدرآباد کے وکلاء نے بدھ کو احتجاج کرتے ہوئے سیشن کورٹ سول کورٹس سمیت ملحقہ عدالتوں کا بائیکاٹ کیا تاہم ہائیکورٹ سرکٹ بینچ حیدرآباد میں مقدمات چلے، سیشن کورٹس سمیت ملحقہ عدالتوں کے بائیکاٹ کے باعث عدالتی امور ٹھپ ہو کر رہ گئے اور سیکڑوں سائلین کو اپنے کاموں کے سلسلے میں دشواری کا سامنا کرنا پڑا، وکلاء رہنمائوں نے مطالبہ کیا ہے کہ سید جعفر شاہ اور عمران پٹھان کا فوری سراغ لگا کر انہیں بحفاظت بازیاب کرایا جائے اور ملزمان کو انصاف کے کٹہرے میں لایا جائے۔