پاکستان اور نیپال کے درمیان علم و ادب کے فروغ کیلئے باہمی تعاون کا معاہدہ طے پاگیا

بدھ 16 مئی 2018 20:22

اسلام آباد ۔ (اُردو پوائنٹ اخبارتازہ ترین - اے پی پی۔ 16 مئی2018ء) پاکستان اور نیپال کے درمیان علم و ادب کے فروغ کیلئے باہمی تعاون کا اپنی نوعیت کا پہلا معاہدہ طے پاگیا ہے۔ نیپال کے دارالحکومت کھٹمنڈو میں پاکستان اور نیپال کے درمیان مفاہمت کی یادداشت پر دستخطوں کی تقریب ہوئی۔ پاکستان کی جانب سے اکادمی ادبیات کے ڈائریکٹر جنرل ڈاکٹر راشد حمید جبکہ نیپال کی طرف سے اکادمی نیپال کے وائس چانسلر نے دستخط کئے۔

(جاری ہے)

اس موقع پر نیپال میں پاکستان کے سفیر مظہر جاوید، قومی تاریخ و ادبی ورثہ ڈویژن کے بین الاقوامی امور کے افسر نوشاد خالق اور نیپال کے حکام بھی موجودتھے۔ ایم او یو پر عملدرآمد کیلئے دونوں ممالک کے حکام آئندہ سال کی حکمت عملی کی تیاری پر فوری کام کا آغاز کریں گے جس کے تحت انگریزی زبان میں شائع شدہ پاکستانی تصانیف کا نیپالی لغت میں ترجمہ کیاجائے گا۔ پاکستانی سفیر مظہر جاوید نے قومی تاریخ وادبی ورثہ ڈویژن اور اکادمی ادبیات پاکستان کی کاوش کو سراہتے ہوئے دونوں ممالک کیدرمیان علم وادب کے شعبہ میں فروغ کے معاہدہ کو خوش آئند قرار دیا۔ انہوں نے کہاکہ علم وادب کے شعبہ میں تعاون سے دونوں ممالک کے عوام کو مزید قریب لانے میں مدد ملے گی۔