سیکرٹری ہائوسنگ خر م آغا اور ڈی سی سمیر احمد سید کا رمضان بازاروں کا اچانک دورہ ،اشیاء کے معیار ،قیمتوں کا جائزہ لیا

ہفتہ 19 مئی 2018 17:01

لاہور (اُردو پوائنٹ اخبارتازہ ترین - این این آئی۔ 19 مئی2018ء) سیکرٹری ہائوسنگ پنجاب خر م آغا اور ڈی سی لاہور سمیر احمد سید نے شادمان اور چونگی دوگیج رمضان بازاروں کا اچانک دورہ کیا۔ انہوںنے رمضان بازاروں میں صفائی ستھرائی کے انتظامات کے علاوہ سٹالز پر رکھی اشیاء کی کوالٹی اور قیمتوں کو چیک کیا۔ سیکرٹری ہائوسنگ پنجاب خر م آغا اور ڈی سی لاہور سمیر احمد سید رمضان بازاروں میں چینی اور آٹا کے سٹالز پربھی گئے اور وہاں پر چینی اور آٹا کے بیگز کا وزن چیک کیا۔

اس موقع پر سیکرٹری ہائوسنگ پنجاب خر م آغا اورڈی سی لاہور سمیر احمد سید نے کہاکہ شہر بھر کے رمضان بازاروں میں چینی اور آٹے کی سپلائی مسلسل جاری ہے اور رمضان بازاروں میں ہر چیز وافر مقدار میں موجود ہیں اور شہری رمضان بازاروں سے مستفید ہورہے ہیں۔

(جاری ہے)

دوسری جانب ڈی سی لاہور سمیر احمد سید کی ہدایت پر تمام اسسٹنٹ کمشنرز نے اپنی اپنی حد ود میں موجود رمضان بازاروں کادورہ کیا۔

انہوںنے رمضان بازاروں میں کیئے گئے انتظامات کا جائزہ لیا۔ اسسٹنٹ کمشنرز نے رمضان بازاروں میں مختلف سٹالز پر جاکر اشیاء ضروریہ کی قیمتوں اور معیار کو چیک کیا۔ علاوہ ازیں ڈی سی لاہور سمیر احمد سید نے شہر میں ہونے والی بارش کے فوری بعد اسسٹنٹ کمشنرز کو ہدایت کی کہ وہ رمضان بازاروں میں نکاسی آب کو یقینی بنائیں اور کسی بھی رمضان بازار کے ارد گرد بارشی پانی کھڑا نہ ہو تاکہ صارفین کو کسی قسم کی دشواری کا سامنا نہ کرنا پڑے۔