ایف آئی اے نے انسانی اسمگلنگ کے تدارک کیلئے کارروائی کے دوران مطلوب ایجنٹ کو گرفتار کرلیا

منگل 29 مئی 2018 22:41

کوئٹہ (اُردو پوائنٹ اخبارتازہ ترین - این این آئی۔ 29 مئی2018ء) وفاقی تحقیقاتی ادارے (ایف آئی ای) نے انسانی اسمگلنگ کی تدارک کیلئے ایک کارروائی کے دوران مطلوب ایجنٹ کو گرفتار کرلیا۔ایف آئی اے حکام کے مطابق ایف آئی اے انسداد انسانی اسمگلنگ سرکل کوئٹہ کی ٹیم نے خفیہ اطلاع پر سیٹلائٹ ٹاؤن میں چھاپہ مار کر مطلوب انسانی اسمگلر مقبول احمد کو گرفتار کرلیا۔

(جاری ہے)

ملزم کا تعلق پنجاب کے شہر خانیوال سے بتایا جاتا ہے اور وہ ایف آئی اے ملتان کو انسانی اسمگلنگ کے ایک مقدمے میں مطلوب تھا۔ایف آئی اے حکام کے مطابق ملزم مقبول احمد پنجاب سے آنے والے ان افراد کیلئے ٹرانسپورٹ کا بندوبست کرتا تھا جو غیر قانونی طور پر ایران جاتے ہیں۔ ٹرانسپورٹ کا بندوبست کرنے کے بعد انہیں کوئٹہ سے پنجگور اور تربت کے غیر روایتی اور غیرمحفوظ راستوں کے ذریعے ایران بھیجا جاتا تھا۔