تربیلا ڈیم ٹرانسفارمر اوورلوڈ، وارسک ڈیم سے پیداوار بند، کے پی کے میں بجلی فراہمی متاثر

پشاور کے علاقے فقیر کالونی میں بجلی کی لوڈ شیڈنگ کے خلاف احتجاج کیا گیا‘ مظاہرین کی ًشدید نعرے بازی

جمعہ 8 جون 2018 12:44

پشاور(اُردو پوائنٹ اخبارتازہ ترین - آئی این پی۔ 08 جون2018ء) تربیلا ڈیم کے ٹرانسفارمر اوور لوڈ ہونے اور وارسک ڈیم سے بجلی کی پیداوار بند ہونے کے باعث صوبہ خیبرپختونخوا کے دارالحکومت پشاور، ایبٹ آباد اور مردان کے مختلف علاقوں میں بجلی کی فراہمی متاثر ہوئی ہے۔پشاور کے علاقے فقیر کالونی میں گزشتہ رات بجلی کی لوڈ شیڈنگ کے خلاف احتجاج کیا گیا۔

مظاہرین نے سڑک کو ٹریفک کے لیے بند کردیا اور حکام کے خلاف نعرے لگائے۔

(جاری ہے)

دوسری جانب پشاور الیکٹرک سپلائی کمپنی (پیسکو) کے حکام کے مطابق تربیلہ ڈیم کے پاور ٹرانسفارمرز پر شدید لوڈ ہے، جس کی وجہ سے مردان اور ہری پور میں بجلی کی فراہمی متاثر ہوئی ہے اور ان علاقوں میں اوور لوڈنگ کے باعث عوام کو باربار کی ٹرپنگ اور کم وولٹیج کا سامنا کرنا پڑ رہا ہے۔حکام نے مزید بتایا کہ وارسک ڈیم سے بجلی کی پیداوار بند ہوگئی ہے، جس کے نتیجے میں پشاور اور ملحقہ علاقوں میں بھی بجلی کی فراہمی متاثر ہوئی ہے۔تربیلا ڈیم کے پاور ٹرانسفارمر اوور لوڈ ہونے اور وارسک ڈیم کی جنریشن بند ہونے کے باعث پشاور، ایبٹ آباد اور مردان کے مختلف علاقوں میں بجلی کی فراہمی متاثر ہوئی ہے۔