اداکار دلیپ کمار کو 2 ہفتوں بعد اسپتال سے ڈسچارج کر دیا گیا

دلیپ کمار کو رواں ماہ پانچ ستمبر کو سینے میں درد اور نمونیا کے باعث ممبئی کے لیلاوتی اسپتال میں داخل کرایا گیا تھا

منگل ستمبر 11:50

ممبئی(اُردو پوائنٹ اخبارتازہ ترین۔ 25 ستمبر2018ء) شہنشاہ جذبات کہلائے جانے والے بالی ووڈ کے لیجنڈ اداکار دلیپ کمار کو دو ہفتوں بعد اسپتال سے ڈسچارج کردیا گیا ہے۔دلیپ کمار کو رواں ماہ پانچ ستمبر کو سینے میں درد اور نمونیا کے باعث ممبئی کے لیلاوتی اسپتال میں داخل کرایا گیا تھا۔جہاں انہیں دو ہفتوں تک انتہائی نگہداشت کے وارڈ میں رکھا گیا تھا۔

اسپتال میں داخل ہونے کے بعد ابتدائی تین دن تک دلیپ کمار کی حالت انتہائی خراب تھی، تاہم چوتھے روز ان کی طبیعت میں بہتری آنا شروع ہوگئی تھی۔

(جاری ہے)

واضح رہے کہ لیجنڈ اداکار دلیپ کمار گذشتہ ایک دہائی سے بیمار اور کمزور ہیں، انہیں متعدد بار سینے میں درد، سانس لینے میں دشواری، بخار اور دیگر بیماریوں کے باعث اسپتال داخل کرایا جاتا رہا ہے۔

علاوہ ازیں بڑھتی عمر کے ساتھ انہیں صحت کے دیگر مسائل بھی ہونے لگے ہیں۔اداکار دلیپ کمار گیارہ دسمبر انیس سوبائیس کو پشاور میں پیدا ہوئے ۔ ان کا اصل نام یوسف خان ہے ۔ انہوں نے انیس سو چوالیس میں بائیس سال کی عمر میں فلمی دنیا میں قدم رکھا۔ان کی آخری فلم ‘قلعہ’ 1998ء میں ریلیز ہوئی تھی۔دلیپ کمار کو 1991 میں پدمابھوشن، 1994 میں دادا صاحب پھالکے اور2015 میں پدماوی بھوشن ایوارڈ سے نوازا گیا۔

متعلقہ عنوان :