سکھ یاتریوں کے علاج معالجے کے بہترین انتظامات مکمل

سیکرٹری ہیلتھ ثاقب ظفر کی طرف سے متعلقہ اضلاع کے ٹیچنگ اداروں اور ہسپتالوں کو مراسلہ جاری

منگل 20 نومبر 2018 18:43

لاہور (اُردو پوائنٹ اخبارتازہ ترین - این این آئی۔ 20 نومبر2018ء) محکمہ صحت پنجاب نے سکھ مت کے بانی بابا گورو نانک دیو کے جنم دن میں شرکت کے لئے آنے والے سکھ یاتریوں کے علاج معالجے کے بہترین انتظامات کرلئے ہیں۔

(جاری ہے)

اس ضمن میں سیکرٹری سپیشلائزڈ ہیلتھ ثاقب ظفر کی طرف سے متعلقہ اضلاع کے ٹیچنگ اداروں اور ہسپتالوں کو مراسلہ جاری کردیا گیا ہے جس میں ہدایت کی گئی ہے کہ 21 سے 30 نومبر تک لاہور، شیخوپورہ، ننکانہ، گوجرانوالہ،سیالکوٹ، حسن ابدال اور ٹیکسلا کے ہسپتالوں میں سکھ یاتریوں کے لئے خصوصی کائونٹر قائم کئے جائیں۔

کسی ایمرجنسی میں خصوصی ایمبولینس بھی دستیاب ہونی چاہیئے۔ سیکرٹری ہیلتھ نے کہا کہ مذہبی رسومات کی ادائیگی کے لئے دنیا بھر سے آنے والے سکھ یاتریوں کے علاج معالجے میں کوئی کسر اٹھا نہیں رکھی جائے گی۔ انہوں نے کہا کہ گورودوارہ جنم استھان ننکانہ، گوردوارہ کرتار پورہ اور گوردوارہ پنجہ صاحب میں محکمہ صحت کی موبائل ٹیمیں بھی موجود رہیں گی۔ انہوں نے یہ ہدایت بھی کی کہ محکمہ متروکہ وقف املاک کے فوکل پرسن سے بھی مستقل رابطہ رکھا جائے۔