فاٹا کی نشستوں کیلئے حلقہ بندیاں 4مارچ2019 تک مکمل کرنے کا فیصلہ

حلقہ بندیوں کیلئے تشکیل دی گئی کمیٹی حلقوں کی دستاویزی فہرست تیار کرنے کے عمل میں مصروف ہے،جس کو 31دسمبر2018 کوشائع کیا جائیگا فاٹا کے انضمام کے بعد خیبر پختونخوا کیلئے نئی مختص ہونے والی نشستوں پر انتخاب عام انتخابات2018 سے ایک سال کے عرصے میں منعقد ہونا ہیں،یہ انتخابات 25جولائی 2019سے پہلیمنعقد ہوں گے،سرکاری دستاویزات

اتوار 16 دسمبر 2018 20:10

اسلام آباد(اُردو پوائنٹ اخبارتازہ ترین - این این آئی۔ 16 دسمبر2018ء) وفاقی حکومت نے کہا ہے کہ فاٹا کے خیبر پختونخوا میں ضم ہونے کے بعد خیبر پختونخوا کیلئے نئی مختص ہونے والی 16نشستوں کی حلہ بندیاں 4مارچ2019تک مکمل کر لی جائیں گی۔سینیٹ کو موصول دستاویزات کیمطابق حکومت کا کہنا ہے کہ حلقہ بندیوں کیلئے تشکیل دی گئی کمیٹی حلقوں کی دستاویزی فہرست تیار کرنے کے عمل میں مصروف عمل ہے،جس کو 31دسمبر2018 کوشائع کیا جائے گا،تاہم حلقہ بندیوں پرمزید کام الیکشن ایکٹ 2017 میں ترمیم کرنے کیلئے رکا ہوا ہے،مسودہ قانون تیار کیا جا رہا ہے۔

دستاویزات کے مطابق 25ویں آئینی ترمیم کی روشنی میں فاٹا کے خیبر پختونخوا میں ضم ہونے کے بعد خیبر پختونخوا کیلئے نئی مختص ہونے والی نشستوں پر انتخاب عام انتخابات2018 سے ایک سال کے عرصے میں منعقد ہونا ہیں،یہ انتخابات 25جولائی 2019سے پہلیمنعقد ہوں گے۔

(جاری ہے)

دستاویزات کے مطابق الیکشن کمیشن کا کہنا ہے کہ حلقہ بندیوں سے متعلق ابتدائی دستاویزات 18اگست2018 سے 10ستمبر تک تیار کیا جائیگا،حلقوں سے متعلق ڈرافٹ لسٹس11ستمبر 2018 سے 30دسمبر2018 تک مکمل کیا جائے گا،حلقوں کی ابتدائی ڈرافٹ لسٹس 31دسمبر 2018 کو پبلش ہوں گی،نمائندگی/اعتراضات یکم جنوری 2019 سے 30جنوری 2019 تک دائر کی جاسکیں گی،نمائندگیوں سے متعلق فیصلہ/سماعت 31جنوری2019 سے یکم مارچ2019تک ہوں گے،جبکہ حلقہ بندیوں کی حتمی چھپائی 4مارچ2019 کو ہو گی۔