ناک ، کان ،گلہ کے شعبے میں سپیشلائزیشن کرنے والے ڈاکٹروں کیلئے جنرل ہسپتال میں خصوصی کورس

لاہور(اُردو پوائنٹ اخبارتازہ ترین - این این آئی۔ 21 مارچ2019ء) ناک ، کان ،گلہ کے شعبے میں سپیشلائزیشن کرنے والے ڈاکٹروں کیلئے لاہور جنرل ہسپتال ای این ٹی ڈیپارٹمنٹ کے زیر اہتمام امتحان کی تیاری کیلئے خصوصی "کریش کورس -"کا اہتمام کیا گیا ،جس میں چاروں صوبوں سے ڈاکٹروں نے بڑی تعداد میں شرکت کی ۔ہیڈ آف دی ڈیپارٹمنٹ ای این ٹی پروفیسر نجم الحسنین و دیگر مقررین نے ڈاکٹر ز،طلبا ء کوناک ، کان ،گلہ کی بیماری ، سرجری اور جدید طریقہ علاج کے بارے میں لیکچرز دئیے ۔

پرنسپل پی جی ایم آئی پروفیسر ڈاکٹر محمد طیب ، بریگیڈئر انوار الحق، پروفیسر ظفر گل، ڈاکٹر سرفراز لطیف، ایم ایس ڈاکٹر محمود صلاح الدین ، ڈاکٹر محمد الیاس سمیت ڈاکٹرز کی بڑی تعداد اس موقع پر موجود تھی جبکہ سٹوڈنٹس نے اس کورس میں گہری دلچسپی کا اظہار کیا۔

(جاری ہے)

پروفیسر نجم الحسنین نے ایف سی پی ایس ، ایم سی پی ایس اور ایم ایس طلباء کو امتحانات کے طریقہ کار کے بارے میں اہم معلومات فراہم کیں تاکہ وہ ایگزیمنر کے دباؤ یا خوف میں آنے کی بجائے تحمل مزاجی کے ساتھ امتحانات دے کر اپنے پیشے میں اعلی مقام حاصل کر سکیں ۔

پرنسپل امیر الدین میڈیکل کالج پروفیسر ڈاکٹر محمد طیب نے طلبہ ڈاکٹرز کو ہدایت کی کہ وہ اپنی پیشہ وارانہ تعلیم ، لگن اور محنت کے ساتھ مکمل کریں اور اپنے شعبے میں غیر معمولی معیار حاصل کریں تاکہ آگے چل کر عملی زندگی میں وہ ایک مایہ ناز ای این ٹی سرجن بن سکیں۔ انہوں نے کہا کہ ڈاکٹری پیشہ نہ صرف عزت و وقار کا ذریعہ ہے بلکہ انسانیت کی خدمت کر کے وہ اللہ کی خوشنودی حاصل کر سکتے ہیں لہذا ڈاکٹرز کو مریضوں کے ساتھ خندہ پیشانی سے پیش آنا چاہیے ان کی مسکراہٹ سے ہی مریض کی آدھی بیماری دور ہو جاتی ہے ۔ڈاکٹر مظہر افتخار نے ملک بھر سے شرکت کرنے والے نوجوان ڈاکٹروں کا شکریہ ادا کیا ۔ تقریب کے اختتام پر ڈاکٹروں میںسر ٹیفکیٹس بھی تقسیم کئے گئے۔