امریکا سے لڑکیوں کی تعلیم کی7 ارب روپے کے معاہدے اور فنڈز میں مبینہ کرپشن کا معاملہ ،وفاقی حکومت نے تفصیلات عدالت میں جمع کرادیں

پیر 1 اپریل 2019 17:57

کراچی (اُردو پوائنٹ اخبارتازہ ترین - این این آئی۔ 01 اپریل2019ء) سندھ ہائی کورٹ میں امریکا سے لڑکیوں کی تعلیم کی7 ارب روپے کے معاہدے اور فنڈز میں مبینہ کرپشن کا معاملہ ،وفاقی حکومت نے تفصیلات عدالت میں جمع کرادی۔سابق وزیر اعظم کی صاحبزادی مریم نواز کے خلاف درخواست کی سماعت سندھ ہائی کورٹ میں ہوئی جہاں وفاقی حکومت نے فنڈز کے اخراجات کی تفصیل پیش کی۔

(جاری ہے)

تفصیلات میں کہا گیا ہے کہ امریکا نے تعلیم کے فروغ کیلئے 70 ملین ڈالرز معاہدے کے تحت دیئی"لیٹ گرلز لرن" پروجیکٹ کیلئے 19 ملین ڈالر دیئے گئے امریکا نے 51 ملین ڈالرز یو ایس ایڈ کے مختلف منصوبوں کیلئے فراہم کیے،ان منصوبوں کیلئے یو ایس ایڈ نے زیادہ تر امریکی این جی اوز کے ذریعے رقم فراہم اور خرچ کی،عدالت نے درخواست گزار کو جواب الجواب جمع کرانے کا حکم دیتے ہوئے سماعت ملتوی کردی ۔

درخواست گزار کا موقف ہے کہ مریم نواز نے جون 2016میں مشل اوباما کے ساتھ امریکا میں پریس کانفرنس کی ،نیوز کانفرنس میں "لیٹ گرلز لرن" مہم کا اعلان کیا گیا ، دو لاکھ لڑکیوں کی تعلیم اور بہبود کا معاہدہ سرد خانے کی نذر ہوگیا ، نیب سے سات ارب روپے کے فنڈزکی تحقیقات کرائی جائے ، پوچھا جائے مریم نواز نے سرکاری عہدے کی بغیر کس حیثیت میں معاہدہ کیا