ایل ای ڈی بلب یا ٹیوب کی بلیو لائٹ آنکھ کے ریٹینا کو نقصان پہنچا سکتی ہے، فرانسیسی وزارت صحت

جمعہ 17 مئی 2019 13:32

پیرس (اُردو پوائنٹ اخبارتازہ ترین - اے پی پی۔ 17 مئی2019ء) فرانس کی وزارت صحت کے حکام نے خبردار کیا ہے کہ ایل ای ڈی بلب یا ٹیوب کی بلیو لائٹ آنکھ کے ریٹینا کو نقصان پہنچا سکتی ہے اور نیند کے قدرتی عمل میں خلل ڈال سکتی ہے۔

(جاری ہے)

صحت سے متعلق وزارت کے نگران ادارہ کی رپورٹ کے مطابق طاقت ور ایل ای ڈی لائٹ فوٹو ٹاکسک ہے جسے سے ریٹینل سیلز کو ناقابل تلافی نقصان پہنچ سکتا ہے اورنظر ختم ہوسکتی ہے جس سے بچائو کے لئے ضروری ہے کہ گھر یا دفتر میں ایل ای ڈی لائٹ کے سامنے کم سے کم بیٹھنے کی کوشش کی جائے۔

آنکھوں کے علاوہ ایل ای ڈی دیگر جسمانی افعال کو بھی متاثر کرتی ہے بالخصوص ضعیف افراد اعصابی تھکاوٹ کا شکار ہوسکتے ہیں۔ ایل ای ڈی لائٹ کا گھروں دفاتر اور صنعتی شعبہ میں استعمال بڑھ گیا ہے جس کے سبب اس کے نقصان دہ اثرات میں بھی اضافہ ہوا ہے تاہم ایل ای ڈی ٹیب، سیل فونز اور لیپ ٹاپ کی سکرین آنکھوں کے لئے مضر نہیں۔