مسلسل دو سہ ماہیوں میں جاپان کی مجموعی ملکی پیداوار میں 2.1 فیصد اضافہ

بدھ 22 مئی 2019 12:53

ٹوکیو (اُردو پوائنٹ اخبارتازہ ترین - اے پی پی۔ 22 مئی2019ء) جاپان کی مجموعی ملکی پیداوار جنوری تا مارچ کی سہ ماہی میں جی ڈی پی کی افزائش سالانہ اعتبار سے 2.1 فیصد رہی ہے۔ جی ڈی پی میں مسلسل دوسری سہ ماہی میں اضافہ ہوا ہے۔

(جاری ہے)

جاپان کے کابینہ دفتر کے حکام کی جانب سے جاری کردہ تازہ ترین اعدادوشمار کے مطابق جنوری تا مارچ کی سہ ماہی میں برآمدات میں 2.4 فیصد کمی ہوئی، اس کی وجہ چین میں اقتصادی سست روی کے باعث الیکٹرونک پرزہ جات کی طلب میں ہونے والی کمی ہے تاہم درآمدات کی صورتحال اس سے کہیں زیادہ خراب تھی۔

گزشتہ موسم خزاں سے خام تیل کی قیمتیں کم ہونے سے ان میں 4.6 فیصد کمی ہوئی ہے۔ جی ڈی پی میں افزائش کی وجہ برآمدات کی نسبت درآمدات میں ہونے والی خاطر خواہ کمی ہے۔ کمپنیوں میں سرمایہ کاری 0.3 فیصد تک کم ہوئی کیونکہ برآمدات اور پیداوار سست ہونے سے مصنوعات سازوں نے سرمایہ کاری کے منصوبے ملتوی کر دیے۔صارف اخراجات میں بھی 0.1 فیصد کمی ہوئی ہے۔ اس کی وجہ چند اشیائے خوردونوش کی قیمتوں میں اضافہ اور صارفین میں کفایت شعاری کا رجحان ہے۔