کپاس کے کاشتکاروں کو چھدرائی کا عمل بروقت مکمل کرنے کی ہدایت

بدھ 19 جون 2019 13:58

فیصل آباد (اُردو پوائنٹ اخبارتازہ ترین - اے پی پی۔ 19 جون2019ء) ماہرین زراعت نے کپاس کے کاشتکاروں کو چھدرائی کا عمل بروقت مکمل کرنے کی ہدایت کی ہے اور کہاہے کہ اگر چھدرائی کا عمل بوائی کے 25 دن کے اندر یا پہلے پانی سے قبل یاخشک گوڈی کے بعد ایک ہی دفعہ مکمل نہ کیاجائے تو فصل کو سخت نقصان پہنچ سکتاہے اسلئے اس ضمن میں کسی غفلت کامظاہرہ نہ کیاجائے ۔

انہوںنے کہاکہ لائنوں میں کاشت کی گئی بی ٹی اقسام کی پہلی آبپاشی بوائی کے 30 سے 35 دن بعد اور باقی آبپاشیاں 12 سے 15 دن کے وقفہ سے کی جانی ضروری ہوتی ہیں تاہم پٹڑیوں پرکاشت کی صورت میں پانی6سی9دن کے وقفہ سے 4سی5مرتبہ لگایا جاسکتاہے نیز اگر اس دوران پودے میں پانی کی کمی کی کوئی علامات ظاہر ہوں تو بوقت ضرورت آبپاشی کی جاسکتی ہے ۔

(جاری ہے)

انہوںنے کہا کہ ڈرل سے لائنوں میں کاشت کی گئی روایتی چھوٹے قد والی اقسام کی پہلی آبپاشی بوائی کے 30سے 40دن بعد اور لمبے قد والی کپاس کی اقسام کی آبپاشی 40 سے 50روز کے بعد کرنا ضروری ہے جبکہ بعد ازاں 12سی15دن کے وقفہ سے آبپاشیوں کاسلسلہ جاری رکھنا چاہیے ۔

انہوںنے کہاکہ کاشتکار فصل کا باقاعدگی سے معائنہ کرتے رہیں اور جڑی بوٹیوں کی تلفی بھی یقینی بنائی جائے۔ انہوںنے کہاکہ اگر کسی جگہ پرکیڑوں کا حملہ نقصان کی معاشی حد سے زیادہ ہو تو محکمہ زراعت کے فیلڈ سٹاف کی مشاورت سے سفارش کردہ زہروں کا استعمال بھی کرناچاہیے۔