چیئرپرسن پنجاب ویمن پروٹیکشن اتھارٹی مس کنیز فاطمہ چدھڑ کا پنجاب انسٹیٹیوٹ آف مینٹل ہیلتھ کا دورہ

حافظ آباد کی مظلوم کنیز فاطمہ سے ملاقات کی جسے بھائیوں نے جائیداد کی خاطر 20سال سے قید کر رکھا تھا

منگل 17 ستمبر 2019 16:10

لاہور(اُردو پوائنٹ اخبارتازہ ترین - این این آئی۔ 17 ستمبر2019ء) چیئرپرسن پنجاب ویمن پروٹیکشن اتھارٹی مس کنیز فاطمہ چدھڑنے گذشتہ روزپنجاب انسٹیٹیوٹ آف مینٹل ہیلتھ کا دورہ کیا اورحافظ آباد کی نائلہ بی بی کی عیادت کی۔ ڈاکٹر سے اس کی صحت کے حوالے سے ساری معلومات دریافت کیں اور حکام کو وزیر اعلیٰ پنجاب جناب عثمان بزدار کی خصوصی ہدایت سے آگاہ کیا کہ نائلہ بی بی کی صحت یابی کے حوالے سے بہتر سے بہتر سہولیات فراہم کی جائیں تاکہ وہ جلد از جلد نارمل زندگی کی طرف مائل ہو سکے۔

واضح رہے کہ حافظ آباد میں دو بھائیوں نے اپنی بہن نائیلہ بی بی کوگذشتہ دس سال سے ایک چھوٹے سے کمرے میں جائیداد کے لالچ میں قید میں رکھا ہوا تھا۔ محلے والوں کی اطلاع پر پولیس نے چھاپا مارا۔

(جاری ہے)

کافی عرصہ سے قید میں رہنے کی وجہ سے نائلہ بی بی کی جسمانی و ذہنی حالت ٹھیک نہ تھی جس کو مدِنظر رکھتے ہوئے اُس کو پنجاب انسیٹوٹ آف مینٹل ہیلتھ، لاہور میں داخل کروایا گیا۔

مس کنیز فاطمہ چدھڑ نے ہسپتال میں موجود دوسرے مریضوں کی بھی عیادت کی۔ وہاں کے بحالی سینٹر کا دورہ کیا جہاں ٹھیک ذہنی حالت کی خواتین کو مختلف قسم کے ہنر سکھائے جاتے ہیں مثلاًً سلائی کڑھائی وغیرہ۔ جس کو انہوں نے بہت سراہا۔ اس موقع پر اُنہوں نے کہا کہ حکومت ِ پنجاب خواتین کے تحفظ و بحالی کے لیے ہر ممکن ا اقدامات کر رہی ہے۔