ڈینگی مچھر کی افزائش کے خاتمہ کیلئے ہر سطح پر صفائی پر توجہ دینے کی ضرورت ہے ، ڈپٹی کمشنر

سرگودھا (اُردو پوائنٹ اخبارتازہ ترین - اے پی پی۔ 01 اکتوبر2019ء) ڈپٹی کمشنر نے کہاکہ ڈینگی مچھر کی افزائش کے خاتمہ کیلئے ہر سطح پر صفائی پر توجہ دینے کی ضرورت ہے ۔ انہوں نے کہا کہ ڈینگی سے بچاؤ کیلئے جہاں سرکاری محکموں کی ذمہ داریاں ہیں وہیں شہریوں کو بھی احتیاطی تدابیر پر عمل پیرا ہونا چاہیے۔ گھروں میں کسی بھی جگہ پانی جمع نہ ہونے دیاجائے ۔

طلوع وغروب آفتاب کے وقت غیر ضروری طو ر پر گھروں سے نکلنے سے پرہیز کیاجائے ۔ مچھر مار آئل استعمال کیا جائے جبکہ بخار کی صورت میں فوری طو رپر ہسپتال سے رجوع کیا جائے۔ اس امر کا اظہار انہوں نے اپنے دفتر کے کانفرنس روم میں انسداد ڈینگی اجلاس کی صدارت کرتے ہوئے کیا ۔ اجلاس میں اے ڈی سی آر کیپٹن ریٹائرڈ شعیب علی او رسی او ہیلتھ ڈاکٹر سلیمان زاہد کے علاوہ محکمہ فشریز ‘ کارپوریشن ‘ ہیلتھ کیئر کمیشن ‘ ماحولیات ‘ تعلیم ‘ انہار او رلیبر محکموں کے افسران بھی موجود تھے ۔

(جاری ہے)

ڈپٹی کمشنر نے تمام محکموں پر زور دیا کہ وہ اپنے دفتر کی صفائی کو یقینی بنائیں ۔پرانا سامان فوری تلف کریں او رمحکمہ صحت کی ٹیموں کے ساتھ بھر پور تعاون کرکے مہم کو کامیاب بنایا جائے۔انہوں نے فیلڈ ٹیموں کی تربیت کا عمل جاری رکھنے کی ضرورت پر زور دیا ۔ انہوں نے ضلع بھر کے پرائیویٹ ہسپتالوں میں بھی ڈینگی وارڈز تیار رکھنے کی ہدایت کی ۔

اس موقع پر بتایاگیا کہ ضلع بھر میں اب تک 64 ڈینگی کے کیس رپورٹ ہوئے جو تمام دیگر اضلاع سے یہاں منتقل ہوئے ۔دو مریض ڈی ایچ کیو میں زیر علاج ہیں جبکہ دیگر تمام صحت یاب ہو کر واپس جاچکے ہیں ۔مزید بتایا گیا کہ ڈینگی لاروا ملنے پر اب تک تین ایف آئی آر بھی درج ہو چکی ہیں ۔ قبل ازیں ایڈیشنل ڈپٹی کمشنر (ریونیو)کیپٹن ریٹائرڈ شعیب علی نے سی ای او ہیلتھ اتھارٹی ڈاکٹر سلیمان زاہد کے ہمراہ شہر کے مختلف علاقوں میں شہریوں کو ڈینگی سے آگہی کے بارے پمفلٹ تقسیم کئے ۔ انہوںنے شہریوں پر زور دیاکہ وہ جاری ہد ایات پر نہ صرف خود عمل کریں بلکہ دوسرے افراد کو بھی اس ضمن میں آگاہ کریں۔