کویت کا مختلف شعبوں میں پاکستان سے افرادی قوت درآمد کرنے کے لئے مفاہمت کی یادداشت طے کرنے کا اصولی فیصلہ

جمعہ 18 اکتوبر 2019 14:54

اسلام آباد (اُردو پوائنٹ اخبارتازہ ترین - اے پی پی۔ 18 اکتوبر2019ء) کویت نے صحت، تعلیم، زراعت اور تعمیرات سمیت مختلف شعبوں میں پاکستان سے ہنر مند، نیم ہنر مند اور غیر ہنر مند افرادی قوت درآمد کرنے کے لئے مفاہمت کی یادداشت طے کرنے کا اصولی فیصلہ کر لیا ہے۔ ترقیاتی شعبہ سے وابستہ سینئر حکام نے جمعہ کو یہاں اے پی پی کو بتایا کہ مفاہمتی یادداشت سے کویت کی افرادی قوت کی منڈیوں کے لئے پاکستانی افرادی قوت کی راہیں کھل جائیں گی۔

(جاری ہے)

حکام نے بتایا کہ اس معاہدے پر اتفاق رائے ابو ظہبی مذاکرات کے پانچویں وزارتی اجلاس کے دوران وزیر اعظم کے معاون خصوصی برائے سمندر پار پاکستانیز سید ذوالفقار عباس بخاری اور کویت کے وزیر مملکت برائے اقتصادی امور مریم ہاشم کی علیحدہ ملاقات کے دوران طے پایا ہے۔ دونوں شخصیات نے ایم او یو پر جلد دستخط کئے جانے کے لئے عزم کا اظہار کیا اور پاکستان کے لئے ویزا شرائط کو آسان بنانے کے طریقوں اور ذرائع پر تبادلہ خیال کیا۔ حکام نے بتایا کہ پاکستان کے پاستمام شعبہ میں کویت کے انسانی وسائل کو پورا کرنے کی بے پناہ صلاحیت موجود ہے۔