فرانس نے مقبوضہ القدس میں متنازع قدیم قبورالسلاطین کو دوبارہ کھول دیا

قبورالسلاطین کے نام سے یہ جگہ مشرقی بیت المقدس کے محلے الشیخ جراح میں واقع ہے،رپورٹ

جمعہ 25 اکتوبر 2019 21:10

مقبوضہ بیت المقدس(اُردو پوائنٹ اخبارتازہ ترین - آن لائن۔ 25 اکتوبر2019ء) مقبوضہ بیت المقدس میں فرانس نے اپنے ملکیتی ایک قدیم مگر متنازع مقبرے (قبورالسلاطین) کو دوبارہ لوگوں کے لیے کھول دیا ہے۔قبورالسلاطین کے نام سے یہ جگہ مشرقی بیت المقدس کے محلے الشیخ جراح میں واقع ہے۔اب سیاح ہفتے میں دو دن مقررہ اوقات میں اس جگہ پر آسکتے ہیں۔

(جاری ہے)

فرانسیسی قونصل خانے کے مطابق آنے والے زائرین کو پہلے آن لائن اپنے ناموں کا اندراج کرنا ہوگا اور ہر مرتبہ آنے کی دس شیکل فیس ادا کرنا ہوگی۔

غیرملکی خبررساں ادارے کے مطابق قبورالسلاطین کے دروازے کھلنے کے بعد قریبا تیس افراد کو وہاں داخل ہونے کی اجازت دی گئی ہے۔ان میں زیادہ تر آرتھو ڈکس یہودی تھے اوروہ وہاں عبادت کے لیے آئے تھے۔وہ اس جگہ کو اپنے لیے بڑی مقدس خیال کرتے ہیں۔الٹرا آرتھوڈکس یہود کا عقیدہ ہے کہ یہاں ان کے قدیم آبا واجداد مدفون ہیں۔فرانس نے اس سے پہلے جون میں اس جگہ کو زائرین کے لیے کھولنے کی کوشش کی تھی۔