یورپی ممالک میں مقیم پاکستانیوں کی ترسیلات زرمیں2.33 فیصد اضافہ

اسلام آباد (اُردو پوائنٹ اخبارتازہ ترین - اے پی پی۔ 26 اکتوبر2019ء) برطانیہ کے علاوہ دیگر یورپی ممالک میں مقیم پاکستانیوں کی ترسیلات زرمیںرواں مالی سال (2019-20 ئ)کی پہلی سہ ماہی میں 2018-19 ء کے اسی عرصے کے مقابلے میں 2.33 فیصد اضافہ ریکارڈ کیاگیاہے۔سٹیٹ بنک کے اس حوالے سے جاری اعداد و شمارکے مطابق جولائی سے ستمبرتک جرمنی، فرانس، ہالینڈ، سپین،اٹلی، سویڈن، ڈنمارک اور بیلجیئم میں مقیم پاکستانیوں نے 169.65 ملین ڈالر کازرمبادلہ ملک ارسال کیا جو گزشتہ سال کے اسی عرصے کے مقابلے میں 2.33 فیصد زیادہ ہے، گزشتہ مالی سال کی پہلی سہ ماہی میں ان ممالک میں مقیم پاکستانیوں نے 165.78 ملین ڈٖالر زرمبادلہ ملک ارسال کیاتھا۔

مالی سال 2017-18 ء کی پہلی سہ ماہی میں یورپی ممالک میں مقیم پاکستانیوں نے 161.74 ملین ڈالر کازرمبادلہ ملک ارسال کیا۔

(جاری ہے)

اعدادوشمارکے مطابق ستمبر 2019ء میں جرمنی، فرانس، ہالینڈ، سپین،اٹلی، سویڈن، ڈنمارک اوربیلجیم میں مقیم پاکستانیوں کی ترسیلات زرکاحجم 53.20 ملین ڈالر رہا جوگزشتہ مالی سال کے اسی عرصہ کے مقابلے میں کم ہے۔گزشتہ سال ستمبر میں یورپی ممالک میں مقیم پاکستانیوں نے 58.14 ملین ڈالرکازرمبادلہ ملک ارسال کیاتھا۔

موجودہ حکومت کی جانب سے منی لانڈرنگ کے خاتمے اورقانونی ذرائع سے ترسیلات زر کیلئے اٹھائے جانے والے اقدامات کے نتیجے میں بیرون ممالک مقیم پاکستانیوں کی ترسیلات زرمیں نمایاں بہتری آرہی ہے۔گزشتہ مالی سال کے دوران بیرون ممالک مقیم پاکستانیوں کی جانب سے ترسیلات زرمیں مجموعی طورپر9.67 فیصد اضافہ ریکارڈ کیا گیا۔