ح*دین اسلام خواتین کی تعلیم اور حقوق کا داعی ہی:منہاج القرآن ویمن لیگ

Y لاہور (اُردو پوائنٹ اخبارتازہ ترین - آن لائن۔ 18 نومبر2019ء) منہاج القرآن ویمن لیگ کی مرکزی صدر فرح ناز نے کہا ہے کہ اسلام خواتین کی تعلیم اور حقوق کے تحفظ کا سب سے بڑا داعی دین ہے، اسلام کے ماڈریٹ ویژن کو پیش کرنے کے لیے سیرت النبی ﷺ کے تمام گوشوں کو عامة الناس کے سامنے پیش کرنا ہو گا، اس ضمن میں منہاج القرآن ویمن لیگ نے پاکستان کے 150شہروں میں 3ہزار سیرت کانفرنسز منعقد کرنے کا پلان وضع کیا ہے، انہوں نے کہا کہ تحریک منہاج القرآن اور شیخ الاسلام ڈاکٹر محمد طاہرالقادری نے میلاد کانفرنسز کے کلچر کو عام کر کے دنیا کے سامنے حضور نبی اکرم ﷺ کی پاک سیرت کو پیش کیا ہے، میلاد پلان 2019 ء کے حوالے سے بریفنگ دیتے ہوئے مرکزی ناظمہ سدرہ کرامت ،انیلہ الیاس اور ام حبیبہ نے بتایا کہ میلاد پلان 2019 ء کے تحت ملک بھر میں سیرت کانفرنسز کا انعقاد شروع ہو گیا ہے، اس کا آغاز 13نومبر کو لاہور سے ہوا۔

(جاری ہے)

انہوں نے بتایا 19 نومبرکو منڈی بہائو الدین ،20 نومبرکو سید والا ، 23نومبر کو راولپنڈی، 24نومبر کو شورکوٹ ، سرگودھا، دیپالپور، جہلم، کرمانوالہ ، یکم دسمبر کو لودھراں، میر پور ،سچا سودا،پنڈدادنخان، 3دسمبر کو مریدکے، 8دسمبر کو اسلام آباد اور چکوال میں سیرت کانفرنس ہوں گی ۔میلاد پلان مہم 2019 ء کے تحت سیرت کانفرنسز سے فرح ناز، سدرہ کرامت، عائشہ شبیر، انیلا الیاس، ادیبہ شہزادی، صائمہ نور خطاب کررہی ہیں۔

فرح ناز نے کہا کہ خواتین کی سیرت کانفرنسز میں تمام مسالک اور سول سوسائٹی کی نمائندہ اور رہنما خواتین کو بھی شرکت کی دعوت دی جارہی ہے، انہوں نے کہا کہ حضور نبی اکرم ﷺ کسی ایک مکتب فکر ،مسلک ،ملک اور خطے کے پیغمبر نہیں بلکہ انہیں رحمتہ للعالمین بنا کر بھیجا گیا ہے، ان کی تعلیمات اور اخلاق حسنہ بلا رنگ و نسل ،زبان، خطہ سب کے لیے ہے۔

اسلام کی نشاة ثانیہ کا احیاء سیرت النبی ﷺ پر عملدرآمد میں ہے۔سدرہ کرامت نے کہا کہ آج کی خواتین کا پرامن سوسائٹی کی تشکیل اور پڑھی لکھی نسل کی تیاری اور تربیت میں مرکزی کردار ہے، کردار سازی کے ضمن میں ہمیں تمام رہنما اصول حضور نبی اکرم ﷺ کی مبارک حیات او ر سیرت سے ملتے ہیں، ہم انہی گوشوں کو خطابات کے ذریعے نمایاں کررہی ہیں۔انیلہ الیاس نے کہا کہ تحریک منہاج القرآن اور شیخ الاسلام ڈاکٹر محمد طاہرالقادری کی ساری توجہ اور تعلیمات عشق مصطفیﷺ کے فروغ اور کردار سازی پر ہے ۔

الحمداللہ اس وقت اندرون اور بیرون ملک مقیم مسلم یوتھ بڑی تعداد میں منہاج القرآن کے تعلیمی، تربیتی پروگرام سے وابستہ ہے۔ ام حبیبہ نے گفتگو کرتے ہوئے کہا کہ اس وقت عالم اسلام انتہا پسندی ،تنگ نظری اور تفرقہ بازی کا شکار ہے جس کا واضح مطلب ہے کہ امت سیرت النبی ﷺ کو بھلاچکی ہے، ہم اللہ کے فضل و کرم اور حضور ﷺ کے نعلین پاک کے تصدق سے خواتین کو اسلام کے ماڈریٹ ویژن سے ہم آہنگ کررہی ہیں، انہوں نے کہا کہ حضور نبی اکرم ﷺ پیغمبر آخر الزماں ہیں، قرآن و سنت کی حقیقی تعلیمات کو عام کرنا یہ امت محمدیہ پر فرض کیا گیا ہے، بلاتفریق جنس ،رنگ و نسل ہر کلمہ گو مسلمان کی یہ ذمہ داری ہے کہ وہ اسلام کی امن، محبت، اخلاق پر مبنی تعلیمات کو عملی زندگی پر نافذ کرنے کے لیے کردار ادا کرے۔

انہوں نے کہا کہ منہاج القرآن ویمن لیگ کی شہرت شہر سیرت کانفرنسز کردار سازی کے اہداف کے ضمن میں سنگ میل ثابت ہوں گی۔