''ای پے پنجاب'' کے ذریعے صرف 100 دن میں 50 کروڑ روپے کا ریکارڈ ٹیکس وصول

ای پے پنجاب سے 13 قسم کے ٹیکس ایک کلک پر آن لائن گھر بیٹھے ادا کئے جا سکتے ہیں

بدھ 15 جنوری 2020 13:47

''ای پے پنجاب'' کے ذریعے صرف 100 دن میں 50 کروڑ روپے کا ریکارڈ ٹیکس وصول

لاہور (اُردو پوائنٹ اخبارتازہ ترین۔ 15 جنوری2020ء) شہریوں کی سہولت اور کاروبار میں آسانی کے لئے حکومت پنجاب کے وضع کردہ سرکاری ادائیگیوں کے آن لائن نظام ''ای پے پنجاب'' کے ذریعے ابتدائی 100 دن میں صوبہ پنجاب سے 50 کروڑ سے زائد ٹیکس جمع ہو چکا ہے یوں ای پے پنجاب ٹیکس محصولات کی وصولی میں اضافے میں گیم چینجر ثابت ہوا ہے۔ یہ بات آج چیئرمین پی آئی ٹی بی اظفر منظور کی زیرصدارت جائزہ اجلاس میں بتائی گئی۔

ای پے پنجاب ‘پی آئی ٹی بی اور محکمہ خزانہ پنجاب کے اشتراک سے گزشتہ برس 4 اکتوبر کو شروع کیا گیا۔ یہ نظام عوام کو پیچیدہ اور روایتی عمل سے گزرے بغیر ٹیکس اور دیگر سرکاری ادائیگیوں کا موثر اور آسان ترین آن لائن ذریعہ فراہم کرتا ہے۔

ای پے پنجاب سے5 سرکاری محکموں کے 13 قسم کے محصولات ایک کلک پر آن لائن گھر بیٹھے ادا کئے جا سکتے ہیں۔

(جاری ہے)

ان کے لئے ان محکموں میں ایکسائز اینڈ ٹیکسیشن، بورڈ آف ریونیو ، پنجاب لینڈ ریکارڈز اتھارٹی ، پنجاب ریونیو اتھارٹی ، انڈسٹریز اور محکمہ ٹرانسپورٹ پنجاب شامل ہیں ۔جو ٹیکس ای پے پنجاب کے ذریعے ادا کئے جا سکتے ہیں ان میں ٹوکن ٹیکس، موٹر وہیکل رجسٹریشن، موٹر وہیکل کی منتقلی، پراپرٹی ٹیکس، پروفیشنل ٹیکس، کاٹن فیس، ای سٹیمپنگ، میوٹیشن فیس، فرد فیس، خدمات پر سیلز ٹیکس، پنجاب انفراسٹرکچرل ڈویلپمنٹ، سیس، روٹ پرمٹ اور بزنس رجسٹریشن فیس شامل ہے۔

ای پے ایپ سے متعلقہ ٹیکس کی ادائیگی کیلئے سترہ ہندسوں کا پی ایس آئی ڈی نمبرجاری ہوتا ہے جسے شہری کسی بھی بینک‘ انٹرنیٹ‘موبائل بینکنگ‘اے ٹی ایم پر اندراج کر کے ٹیکس کی ادائیگی ادا کر سکتے ہیں۔ اجلاس کو بتایا گیا کہ عنقریب شہریوں اور کاروباری طبقے کی سہولت کیلئے ڈیبٹ / کریڈٹ کارڈ، موبائل والٹس، ٹیلکو ایجنٹ نیٹ ورکس اور ڈائریکٹ ڈیبٹ جیسے ادائیگی کے نئے چینلز کو شامل کیا جارہا ہے۔

اسکے علاوہ بہت جلد ای پے پنجاب کے ذریعے سکولوں و کالجوں کی آن لائن داخلہ فیس، ڈرائیونگ لائسنس فیس، ای چالان، کریکٹر سرٹیفکیٹ، ڈومیسائل، فٹنس سرٹیفکیٹ (کمرشل گاڑیاں) اور ایگری انکم ٹیکس بھی ادا کئے جا سکیں گے۔