کرپشن سے لتھڑے ہوئے نظام کو تقویت دی گئی تو پاکستان اور عوام کبھی ترقی نہیں کر سکیں گے ‘ جمشید اقبال چیمہ

لاہور(اُردو پوائنٹ اخبارتازہ ترین - این این آئی۔ 29 جنوری2020ء) پاکستان تحریک انصاف کے مرکزی رہنما جمشید اقبال چیمہ نے کہا ہے کہ منفی پراپیگنڈے اور سازشوں کے باوجود پاکستان وزیر اعظم عمران خان کی قیادت میں آگے بڑھ رہا ہے ، اگر سابقہ حکمرانوں کے کرپشن سے لتھڑے ہوئے نظام کو تقویت دی گئی تو پاکستان اور عوام کبھی ترقی نہیں کر سکیں گے ، حکومت نے زراعت کی ترقی کیلئے کئی منصوبے شروع کئے ہیں جس سے دوسرے شعبے بھی عروج حاصل کریں گے۔

ان خیالات کا اظہارا نہوں نے اپنے دفتر میں پارٹی رہنمائوں اور کسانوں کے وفد سے ملاقات میں گفتگو کرتے ہوئے کیا ۔ جمشید اقبال چیمہ نے کہا کہ حکومت کی مثبت پالیسیوں سے ہر شعبے میں استحکام آرہا ہے ، آج پاکستانی روپیہ مصنوعی طریقے سے نہیں بلکہ حقیقت میں مستحکم ہے جس کے معیشت پر بہترین اثرات مرتب ہو رہے ہیں ۔

(جاری ہے)

انہوںنے کہا کہ جو عناصر منفی پراپیگنڈے کے ذریعے حکومت کے خلاف سازشوںمیں مصروف ہیںانہیں سوائے ناکامی کے کچھ حاصل نہیں ہوگا ،پاکستان وزیر اعظم عمران خان کی قیادت میں آگے بڑھ رہا ہے اور ہر گزرتے دن کے ساتھ اس رفتار کو تیز کیا جارہا ہے ۔

انہوں نے کہا کہ ہم نے ملک سے کرپشن اور فرسودہ نظام کو ختم کر کے شفافیت لانی ہے اور اس کیلئے مزاحمت کا سامنا بھی ہے لیکن پاکستان کی ترقی کی راہ میں حائل ہونے والی ہر رکاوٹ کو کچل دیا جائے گا ۔ انہوں نے کسانوں کے وفد کو یقین دہانی کرائی کہ زرعی لوازمات اور بجلی کے بلوں پر سبسڈی دینے کا سلسلہ جاری رہے گا جبکہ حکومت کسانوں کی معاونت کے لئے مزید منصوبے لے کر آرہی ہے جو وزیر اعظم عمران خان کا کسان دوستی کا منہ بولتا ثبوت ہے۔