سعودی عرب میں باجماعت نماز پر پابندی کے حکم کی خلاف ورزی پر سخت کارروائی ہوگی

ریاض (اُردو پوائنٹ تازہ ترین اخبار۔ 17 مارچ 2020ء) سعودی عرب میں باجماعت نماز پر پابندی کے حکم کی خلاف ورزی پر سخت کارروائی ہوگی۔ سعودی وزیر مذہبی امور نے کہا ہے کہ سعودی عرب میں باجماعت نماز پر پابندی کی خلاف ورزی کرنے والوں کے خلاف سخت اقدام کیا جائے گا۔ واضح رہے کہ مسجد الحرام اور مسجد نبوی کے علاوہ سعودی عرب کی دیگر تمام مساجد میں نماز کی ادائیگی پر پابندی عائد کردی گئی ہے، فیصلے کا اطلاق فوری ہوگا، کرونا وائرس کے خدشے کے پیش نظر میدان عرفات کو بھی بند کر دیا گیا، سعودی عرب میں کرونا وائرس کے 100 سے زائد کیسز رپورٹ ہو چکے۔

تفصیلات کے مطابق کرونا وائرس کے خدشات کے باعث سعودی حکومت کی جانب سے ہنگامی فیصلہ کیا گیا ہے۔ سعودی حکومت نے پورے ملک کی مساجد میں نماز کی ادائیگی پر پابندی عائد کر دی ہے۔

(جاری ہے)

تاہم اس پابندی کا اطلاق مسجد الحرام اور مسجد نبویﷺ پر نہیں ہو گا۔ اعلان کیا گیا ہے کہ مساجد میں نماز کی ادائیگی پر پابندی کے فیصلے کا اطلاق فوری کر دیا گیا ہے۔

مزید بتایا گیا ہے کہ سعودی عرب میں کورونا وائرس کے بڑھتے ہوئے کیسز کے باعث عمرہ زائرین پر مکمل پابندی لگائی گئی ہے۔اور اب وزیر مذہبی امور نے کہا ہے کہ سعودی عرب میں باجماعت نماز پر پابندی کی خلاف ورزی کرنے والوں کے خلاف سخت اقدام کیا جائے گا۔ دوسری جانب مملکت کو پندرہ روز کے لیے لاک ڈاؤن بھی کر دیا گیا ہے، جس کے بعد کوئی شخص مملکت سے باہر جا سکتا ہے اور نہ مملکت میں آ سکتا ہے۔

تاہم ابھی تک کورونا وائرس پر قابو نہیں پایا جا سکا، ہر گزرتے دن کے ساتھ درجنوں کیسز سامنے آ رہے ہیں، جس کے باعث سعودی حکام اور عوام میں شدید تشویش پائی جا رہی ہے۔ مزید بتایا گیا ہے کہ سعودی عرب میں کورونا کے مزید 15 نئے کیسز سامنے آئے ہیں ،جس سے مجموعی متاثرین کی تعداد 133ہو گئی ہے۔سعودی حکام کی جانب سے بتایا گیا ہے کہ کرونا کے تازہ ترین شکار بننے والوں میں اسپین سے آنے والی ایک خاتون بھی شامل ہے۔ جسے الظہران کے ایک قرنطینہ مرکز میں منتقل کر کے اس کا علاج کیا جا رہا ہے۔ جبکہ القطیف کے صوبے میں بھی ایک سعودی خاتون کورونا کا تازہ ترین شکار بنی ہے۔