چیئرمین پیمرا کا پیمرا ملازمین کی جانب سے کورونا سے نمٹنے کیلئے عطیہ کا اعلان

کورونا کی وباء سے نمٹنے کیلئے قوم کو متحد ہونے ،اپنا کردار ادا کرنے کی ضرورت ہے ،محمد سلیم بیگ

منگل 24 مارچ 2020 18:51

چیئرمین پیمرا کا پیمرا ملازمین کی جانب سے کورونا سے نمٹنے کیلئے عطیہ ..

اسلام آباد (اُردو پوائنٹ اخبارتازہ ترین - این این آئی۔ 24 مارچ2020ء) پاکستان الیکٹرانک میڈیا ریگولیٹری اتھارٹی (پیمرا)کے چیئرمین محمد سلیم بیگ نے کوروناسے نمٹنے کیلئے عطیہ کا اعلان کرتے ہوئے پی ایس 10 اور اس سے اوپر کے عہدے کے افسران کی تین دن جبکہ پی ایس ایک سے نو سکیل کے ملازمین اور کنسلٹنٹس کی دو دن کی تنخواہ عطیہ کرنے کا اعلان کیا۔ اس موقع پر چیئرمین پیمرا نے کہا ہے کہ کورونا کی اس وباہ سے نمٹنے کیلئے تمام قوم کو متحد ہونے اور اپنا کردار ادا کرنے کی ضرورت ہے ۔

شہری وفاقی وصوبائی حکومتوں کی جانب سے جاری کردہ احتیاطی تدابیر پر سختی سے عمل کریں تاکہ وائرس کو پھیلنے سے روکا جا سکے۔ مخیر حضرات بڑھ چڑھ کر کورونا وائرس سے متاثرہ افراد اور عمومی ضرورت مندوں کی امداد کیلئے میدانِ عمل میں آئیں اور زیادہ سے زیادہ ضروت مندبھائیوں کی مدد کریں۔

(جاری ہے)

مزید برآں انہو ں نے کہا کہ کورونا کی روک تھام کیلئے ضروری اقدامات کے ساتھ ساتھ عوام میں بھرپور آگاہی کی ضرورت ہے اور اس مقصد کیلئے میڈیا بنیادی حیثیت رکھتاہے، پیمرااور تمام پرائیویٹ میڈیا اس قومی فریضہ میں اپنا کردار ادا کرتے ہوئے عوامی آگاہی سے متعلق پیغامات عوام الناس تک باہم پہنچا رہے ہیں تاکہ حفاظتی تدابیر پر عمل پیرا ہو کر عوام اس وائرس پر جلد از جلد قابو پا سکیں ۔

چیئرمین پیمرا نے تمام میڈیا ہاؤسز پر زور دیا کہ وہ اپنے عملے کی صحت و حفاظت کو یقینی بنائیں اور پیشہ ورانہ فرائض سرانجام دیتے ہوئے مروجہ حفاظتی تدابیر اختیار کریں تاکہ وہ اس وباء سے محفوظ رہ سکیں۔