کوروناکے باوجود سعودی عرب میں امتحانات مقررہ وقت پر ہوں گے

ریاض(اُردو پوائنٹ تازہ ترین اخبار۔28مارچ 2020ء) سعودی مملکت میں کورونا وائرس پر قابو نہیں پایا جا سکا۔ اسی وجہ سے چند روز قبل مملکت میں تعلیمی سرگرمیاں بند کر دی گئی تھیں۔ مملکت میں لاکھوں طلباء اس وقت اپنے سالانہ امتحانات کے حوالے سے فکر مند ہیں۔ اس بارے میں وزارت تعلیم کی جانب سے اہم اعلان کیا گیا ہے۔سعودی وزارت تعلیم کی ترجمان ابتسام الشہری نے کہا ہے مملکت میں امتحانات مقررہ وقت پر ہی ہوں گے۔

کرونا وائرس کی وجہ سے امتحانات کا شیڈول تبدل نہیں ہوگا۔کسی غیر معمولی تبدیلی پر ہی اس میں ردوبدل ہوسکے گا۔العربیہ نیٹ نیوز کے مطابق وزارت تعلیم کا کہنا ہے کہ فاصلاتی تعلیم کا عمل جاری رکھا جائے گا۔ طلباء کے امتحانات کے لیے آن لائن امتحانات کے ساتھ مختلف آپشن موجود ہیں۔

(جاری ہے)

اس حوالے سے 10 رمضان المبارک کی تاریخ مقرر کی گئی ہے۔ فی الحال امتحانات کا شیڈول تبدیل کرنے کا کوئی پروگرام نہیں۔

الشہری کا کہنا تھا کہ طلباء کی تعلیم کا تسلسل ان کی پہلی ترجیح ہے۔ وہ کورونا کی وباء کی وجہ سے طلباء کا سال ضائع نہیں ہونے دیں گے۔ ترجمان کا کہنا تھا کہ طلباء اور طالبات کو فاصلاتی تعلیم کے طریقہ کار پر سختی سے کاربند رہنا چاہیے۔ایک سعودی ٹی وی چینل کو دیئے گئے انٹرویو کے دوران الشہری نے واضح کیا کہ شاہی حکم کے مطابق مملکت بھر میں آن لائن ایجوکیشن کا سلسلہ رمضان تک جاری رہے گا۔

الشہری کا یہ بھی کہنا تھا کہ اگر خدانخواستہ مستقبل میں کورونا وائرس کی وبا پھیل گئی تو پھر تعلیمی اداروں کی عمارتوں کو قرنطینہ اور علاج معالجے کے مراکز کے طور پر استعمال کیا جائے گا۔ اسی وجہ سے سکولوں’ کالجوں اور یونیورسٹیوں کی عمارتیں وزارت صحت کے حوالے کردی گئی ہیں- واضح رہے کہ وزارت تعلیم نے محکمہ صحت کی سفارش پر 9 مارچ 2020ء سے تمام سرکاری و نجی تعلیمی اداروں کو عارضی طور پر تا اطلاع ثانی بند کرنے کا اعلان کیا تھا۔