وفاقی وزیر برائے بحری امور سید علی حیدر زیدی سے جاپان کے سفیر کی ملاقات،کورنگی فش ہاربر کے ترقیاتی منصوبوں پر تبادلہ خیال کیا

اسلام آباد ۔ (اُردو پوائنٹ اخبارتازہ ترین - اے پی پی۔ 21 مئی2020ء) پاکستان میں جاپان کے سفیر ایچ ای میتسوڈا کونینوری اور مسٹر توکیتا یوجی نے معیشت و ترقی کے مشیر نے وفاقی وزیر برائے بحری امور سید علی حیدر زیدی سے کورنگی فش ہاربر کے ترقیاتی منصوبوں پر تبادلہ خیال کرنے کے لیے ملاقات کی ہے۔ وزارت بحری امور کے مطابق دونوں فریقوں نے اس عمل کو تیز کرنے پر زور دیا تاکہ کوویڈ 19کے بعد جب حالات معمول پر آجائیں تو ان پر کام شروع ہوسکے۔

منصوبوں میں کورنگی فش ہاربر میں نیلامی ہال کی تعمیر، بزنس پارک کا قیام اور کولڈ اسٹوریج فریزنگ ٹنل شامل ہیں۔ یہ منصوبے ڈبلیو ٹی او، یورپی یونین اور سمندری غذا کی درآمد کرنے والے ممالک کے طے کردہ معیار پر پورا اترنے میں مدد کریں گے۔

(جاری ہے)

علی زیدی نے دوسری جنگ عظیم کے بعد جاپان کی مثالی ترقی کا حوالہ دیتے ہوئے کہا کہ جاپانی معیشت نے ’’اندرونی‘‘ حکمت عملی کی اہمیت کا اعادہ کیا جس کے تحت افرادی قوت کی ترقی کو اولین اہمیت دی جاتی ہے۔

پاکستان میں ہمارے پاس مہارت و صلاحیت موجود ہے جس کو صرف کچھ نکھارنے کی ضرورت ہے، سستی لیبر مارکیٹ کی وجہ سے پیداوار کی لاگت کم ہے اور برآمدات کے شعبے کے لئے ہماری شرح زر مبادلہ سازگار ہے، ہمیں صرف سازگار ماحول کی تشکیل کی ضرورت ہے، ہمارے عوام اور ہماری قوم ترقی میں تمام اقوامِ عالم کو پیچھے چھوڑ دینگے۔ علی زیدی نے پورٹ قاسم میں جاپانی کمپنیوں کے لئے ایک تکنیکی صنعتی زون کی تجویز پیش کی ہے۔

مذکورہ بالا کے علاوہ، دونوں نے ماہی گیروں کے لئے ایک تربیتی ادارے کے قیام پر بھی گفتگو کی جہاں گہرے سمندر کی ماہی گیری سے متعلقہ آئندہ نسل کو تربیت دی جائے گی۔ملاقات میں جاپانی سفیر نے جاپان اور پاکستان کے مابین گذشتہ سال ہونے والی ایک ایم او سی کا بھی ذکر کیا جس کے تحت پاکستانی، فشریز اور میری ٹائم سیکٹر میں روزگار حاصل کرنے کے مواقع کو بروئے کار لا سکتے ہیں۔ علی زیدی نے جاپانی بحری جہاز کمپنیوں میں پاکستانی سی فیررز کو ملازمت دینے پر بھی جاپانی سفیر سے بات کی۔