فواد چوہدری کا ڈرامہ ارطغرل غازی کے خلاف بیان ، سوشل میڈیا پر نئی بحث شروع ہوگئی

اسلام آباد (اُردو پوائنٹ اخبارتازہ ترین - این این آئی۔ 31 مئی2020ء) وفاقی وزیر برائے سائنس اینڈ ٹیکنالوجی فواد چوہدری کا شہرہ آفاق ترکش ڈرامہ ارطغرل غازی کے خلاف بیان سامنے آیا ہے جس کے بعد سوشل میڈیا پر ایک نئی بحث شروع ہوگئی ہے۔وفاقی وزیر فواد چوہدری کی جانب سے مائیکرو بلاگنگ سائٹ ٹوئٹر پر ایک ٹوئٹ کیا گیا جس میں انہوں نے ارطغرل غازی نشر کرنے کی مخالفت کی۔

فواد چوہدری نے اپنے ٹوئٹ میں کہا کہ حیران ہوں کہ پی ٹی وی دوسرے ممالک کی پروڈکشن پر فخر محسوس کر رہا ہے، آپ لوگوں کو پاکستان کی پروڈکشن پر توجہ دینی ہوگی، اگر ایسا نہیں کیا گیا تو دیگر غیر ملکی ڈرامے پاکستان کی پروڈکشن کو برباد کر دیں گے۔انہوں نے کہا کہ غیر ملکی ڈراموں کو درآمد کرنا ہمیشہ ہی سستا ہے لیکن یہ طویل عرصے تک ہماری پروگرامنگ پر تک تباہ کن اثر ڈالتا ہے۔

(جاری ہے)

فواد چوہدری کے اس بیان پر ایک صارف کی جانب سے کمنٹ کیا گیا کہ پی ٹی وی کوارطغرل غازی کی طرح کا ڈرامہ تیار کرنے دیں، کیا وہ یہ کر سکتے ہیں۔صارف کے سوال کا جواب دیتے ہوئے وفاقی وزیر کا کہنا تھا کہ ہاں کیوں نہیں۔خیال رہے کہ وفاقی وزیر برائے سائنس و ٹیکنالوجی فواد چوہدری نے اس سے قبل ترکش ڈرامہ ارطغرل غازی کی حمایت میں متعدد ٹوئٹس کیے تھے۔فواد چوہدری سے قبل کئی فنکار جن میں ریما اور شان بھی شامل ہیں، ارطغرل غازی کو نشر کرنے کی مخالفت کر چکے ہیں۔