امریکہ میں کورونا وائرس کی شدت میں کمی نہ آ سکی

گزشتہ چوبیس گھنٹوں کے دوران مزید 1400 سے زائد افراد ہلاک، مجموعی اموات کی تعداد 1 لاکھ 50 ہزار سے تجاوز کر گئی

کامران حیدر اشعر جمعرات 30 جولائی 2020 06:55

واشنگٹن (اردو پوائنٹ اخبار تازہ ترین۔ 30 جولائی 2020ء) امریکہ میں کورونا وائرس کی شدت میں کمی نہ آ سکی۔ گزشتہ چوبیس گھنٹوں کے دوران مزید 1400 سے زائد افراد ہلاک، مجموعی اموات کی تعداد 1 لاکھ 50 ہزار سے تجاوز کر گئی۔ تفصیلات کے مطابق امریکہ میں کورونا وائرس کی تباہ کاریوں میں کمی نہیں آ سکی ہے۔ تازہ اعداد و شمار کے مطابق امریکہ میں گزشتہ چوبیس گھنٹوں کے دوران مزید 1440 افراد لقمہ اجل بن گئے ہیں جس کے بعد ہلاکتوں کی مجموعی تعداد 1 لاکھ 50 ہزار سے زائد ہو گئی ہے۔

کورونا سے متعلق معلومات فراہم کرنے والے عالمی میٹر کے مطابق امریکہ میں گزشتہ روز 66 ہزار سے زائد افراد کورونا میں مبتلا ہوئے جس کے بعد متاثرین کی مجموعی تعداد 45 لاکھ 60 ہزار سے بڑھ گئی ہے۔

JUST IN: 1,440 coronavirus deaths in the United States over the past 24 hours, according to Johns Hopkins.
— The Spectator Index (@spectatorindex) July 30, 2020

امریکہ میں کورونا وائرس سے مجموعی طور پر متاثرہ افراد میں سے 22 لاکھ 40 ہزار کے قریب افراد مہلک وائرس کو شکست دینے میں کامیاب بھی ہوئے ہیں تاہم اس کے باوجود ملک میں کورونا کے ایکٹو کیسز کی تعداد 21 لاکھ 60 ہزار سے زیاہ ہے۔

(جاری ہے)

امریکہ میں اس وقت 18 ہزار سے زیادہ کورونا کے مریض ایسے ہیں جن کی حالت تشویشناک بتائی جاتی ہے۔ دوسری جانب امریکہ میں کورونا وائرس کی دو ممکنہ ویکسینز کی وسیع پیمانے پر حتمی آزمائش کا آغاز کر دیا گیا ہے۔ نیشنل انسٹی ٹیوٹ آف الرجی اینڈ انفیکشس ڈیزز کے سربراہ ڈاکٹر انتھونی فاؤچی نے صحافیوں کو بتایا کہ آخری مرحلے کی آزمائش کے ابتدائی نتائج نومبر تک معلوم ہوجائیں گے۔

اگر آزمائش کامیاب رہی تو موڈرنا ہر سال ویکسین کی 50 کروڑ خوراکیں فراہم کرے گی جبکہ اسے امید ہے کہ وہ سالانہ ایک ارب خوراکیں بنانے کے قابل ہوجائے گی۔ دوسری تجرباتی ویکسین امریکی کمپنی فائزر نے تیار کی ہے جس میں اسے جرمنی کی بائیو این ٹیک کا تعاون حاصل ہے۔ یہ ویکسین امریکہ، برازیل، ارجنٹائن اور جرمنی میں 30 ہزار افراد کو دی جائے گی۔