پہلی ویکسین کورونا کو کنٹرول نہیں کر سکے گی، سائنسدانوں نے خبردار کر دیا

لندن(اُردو پوائنٹ اخبارتازہ ترین - آن لائن۔ 26 ستمبر2020ء) سائنسدانوں نے برطانوی وزیروں کو خبردار کیا ہے کہ کورونا وائرس کی پہلی ویکسین صرف علامات کو کم کر سکتی ہے تاہم اس بات کا امکان نہیں ہے کہ یہ ویکسین لوگوں کو بیماری سے بچا سکتی ہے۔ویلکم ٹرسٹ میں ویکیسن کے شعبے کے سربراہ چارلی ویلز نے کہا کہ ممکنہ طور پر پہلی ویکسین کا محدود اثر ہوگا۔

اس کے ساتھ انفیکشن کو کنٹرول کرنے کے دیگر حفاظتی اقدامات کرنے کی ضرورت ہوگی۔چارلی ویلز کے مطابق ’بہت ساری امیدیں ہیں، قابل فہم، باقی ویکسین پر انحصار کرنا کہ یہ ایک حیرت انگیز دوائی ثابت ہوگی اور زندگی بھر مدافعت دے گی اور ہمیں واپس اگلے روز معمول کی زندگی پر لے آئے گی، لیکن یہ بہترین حل نہیں ہوگا، یہ ایک مشکل <صورتحال کے لیے آسان حل نہیں ہے۔

(جاری ہے)

انہوں نے کہا کہ ایسا ہو سکتا ہے کہ ہم 50 فیصد موثر ویکسین حاصل کر لیں، ایسا بھی ہوسکتا ہے کہ ہم ایسی ویکسین حاصل کریں جو بیماری سے بچا سکے لیکن ہو سکتا ہے کہ یہ ایک فرد سے دوسرے فرد میں وائرس کی منتقلی کو نہ روک سکے‘ان کا مزید کہنا تھا کہ ہم ایسی ویکسین بھی حاصل کرسکتے ہیں جو زیادہ بالغ افراد کے لیے محفوظ ہو لیکن ایسا بھی ہو سکتا ہے کہ یہ ہر کسی کے لیے نہ ہو، جیسے وہ ذیابطیس، دمہ یا دیگر امراض میں مبتلا ہو۔

انگلینڈ کے چیف میڈیکل افسر کرس وٹی کے مطابق اس بات کا امکان کم ہے کہ کورونا وائرس کی پہلی ویکسین ہر کسی کو بچائے گی تاہم ابتدائی ویکسین شدید بیماری کے خطرے کو کم کرسکتی ہے اور حساس گروپس میں اموات کو بھی کم کرسکتی ہے۔آکسفورڈ یونیورسٹی کے جینر انسٹی ٹیوٹ کے ویکسین بنانے والے ایک گروپ اور آکسفورڈ ویکسین گروپ نے کم از کم 50 فیصد تحفظ کا ہدف مقرر کیا ہے۔