یو ای ٹی لاہور کو سولر انرجی پر منتقل کردیا گیا

لاہور(اُردو پوائنٹ اخبارتازہ ترین - این این آئی۔ 12 اکتوبر2020ء) گورنر پنجاب چودھری محمد سرور نے کہا ہے کہ یو ای ٹی کا سولر انرجی منصوبہ دیگر یونیورسٹیز کیلئے مشعل راہ ہے، ہماری حکومت متبادل توانائی کے ذرائع کی حوصلہ افزائی کر رہی ہے، ہم سرکاری اور نجی تعلیمی اداروں میں سولر انرجی منصوبے لگانے کی کوشش کر رہے ہیں۔ان خیالات کا اظہار انہوں نے یو ای ٹی لاہور میں سولر انرجی منصوبے کی افتتاحی تقریب سے خطاب کرتے ہوئے کیا، چودھری محمد سرور کا مزید کہنا تھا کہ میری خواہش ہے کہ ہماری جامعات دنیا کی پہلی پانچ سو جامعات میں شمار ہوں اور ان کا معیار تعلیم مزید بہتر ہو، گورنر پنجاب نے وائس چانسلرز کے اختیارات اور جامعات کا بجٹ کم کرنے کی خبروں کی سختی سے تردید کی۔

ان کا کہنا تھا کہ جب تک وہ چانسلر ہیں، صوبے کی کسی بھی یونیورسٹی کے وی سی کے اختیار کم نہیں ہوں گے، پنجاب حکومت جامعات کی مشاورت سے ہی کوئی پالیسی ترتیب دے گی۔

(جاری ہے)

قبل ازیں صوبائی وزیر انرجی ڈاکٹر اختر ملک نے تقریب سے خطاب کرتے ہوئے کہا کہ ہمارے سولر پینل کے پائلٹ پروجیکٹ یو ای ٹی سے ہی شروع ہو رہے ہیں۔ہماری حکومت توانائی کے بحران پر قابو پانے کیلئے منصوبے لگا رہی ہے، اگر 60 یونیورسٹیز میں شمسی توانائی کے منصوبے لگ جائیں تو قومی خزانے کو اربوں روپے کی بچت ہوگی۔

یونیورسٹیز اس وقت 26روپے یونٹ بجلی خرید رہی ہیں مگر شمسی توانائی کے ذریعے انہیں 10 روپے یونٹ بجلی ملے گی۔انہوں نے بتایا کہ اب تک 8ہزارسکولوں کو سولر انرجی پر منتقل کردیا گیا ہے۔تقریب کے دوران پراجیکٹ ڈائریکٹر ڈاکٹر وقار محمود نے یو ای ٹی کے تمام جاری سولر انرجی کے پراجیکٹس پر روشنی ڈالی۔جن سے یونیورسٹی کوبجلی کے بل کی مدمیں سالانہ60ملین کا فائدہ ہوگا۔

اس موقع پر وائس چانسلر ڈاکٹر منصور سرور نے گورنرپنجاب کا شکریہ ادا کیا۔ انہوں نے کہا کہ کلین اینڈ گرین انرجی اس وقت دنیا کی ضرورت بن چکی ہے۔ یو ای ٹی اس منصوبے سے جہاں سالانہ کروڑوں روپے کی بچت کرے گی، وہی رقم یونیورسٹی میں تحقیقی کاموں کیلئے خرچ ہوگی۔ انہوں نے ملک میں کلین اینڈ گرین انرجی کے فروغ کی ضرورت پر زور دیا۔واضح رہے کہ اس منصوبے کی پیدواری صلاحیت ایک میگا واٹ ہے۔