حضور اکرم ﷺ کی آمد سے سارا عالم جگمگا اٹھا،زندگی تمام انسانوں کے لیے بہترین نمونہ ہے، سردار مسعود خان

آپؐ کی شخصیت انسانیت کی معراج سے بھی بہت بلند ہے،دنیا کے اندھیروں میں صرف یہی ایک چراغ ہے،عالم رنگ و بو میں وہی ایک ذات حق و صداقت کا مرکز اور ہدایت کا روشن مینار ہے، صدر آزاد کشمیر

جمعرات 29 اکتوبر 2020 16:58

حضور اکرم ﷺ کی آمد سے سارا عالم جگمگا اٹھا،زندگی تمام انسانوں کے لیے ..

مظفرآباد(اُردو پوائنٹ اخبارتازہ ترین - این این آئی۔ 29 اکتوبر2020ء) صدر آزاد جموں وکشمیر سردارمحمد مسعود خان نے کہا ہے کہ کلربیع الاول کا وہ مقدس دن ہے جب تاجدارمدینہ،فخر موجودات،رحمت العالمین حضرت محمد مصطفیﷺ کی ولادت باسعادت ہوئی۔حضور اکرم ﷺ کی آمد سے سارا عالم جگمگا اٹھا۔آج پوری مسلم دنیا کی طرح آزاد کشمیر میں بھی 12ربیع الاول کا بابرکت دن انتہائی عقیدت و احترام اور مذہبی جوش و جذبے سے منایا جا رہا ہے۔

ساری دنیا کے مسلمانوں کے لیے اس پاک اور مقدس یو م کی اہمیت ہمیشہ کی طرح بہت زیادہ ہے۔ صدر محمد مسعو د خان نے جشن عید میلاد النبی ﷺ کے موقع پر اپنے پیغام میں کہا کہ محسن انسانیت حضرت محمد ﷺ اس وقت دنیا میں تشریف لائے جب تمام دنیا کے انسان جہالت،پستی اور کفر کے اندھیروں میں ڈوبے ہوئے تھے۔

(جاری ہے)

اخلاق،شائستگی اور تہذیب سے ناواقف تھے جائز ناجائز،حلال حرام،شائستہ ناشائستہ کی تمیز سے وہ نا آشنا تھے۔

قتل،خون ریزی اور ہر برائی انکی زندگی کے معمولات تھے۔خدائے عظیم و بزرگ و برتر کو اہل زمین کی اس پستی اور زبوں حالی پر رحم آیا اور اس نے ان کی ہدایت کے لیے اپنے برگزیدہ بندے حضرت محمد مصطفی ﷺ کو معبوث فرمایا۔آپؐ کی شخصیت انسانیت کی معراج سے بھی بہت بلند ہے۔دنیا کے اندھیروں میں صرف یہی ایک چراغ ہے۔عالم رنگ و بو میں وہی ایک ذات حق و صداقت کا مرکز اور ہدایت کا روشن مینار ہے۔آپ ؐکی زندگی تمام انسانوں کے لیے بہترین نمونہ ہے۔