مصر کا اسرائیل سے رابطہ، القدس میں کشیدگی کم کرنے پر زور

مصر کابیت المقدس میں جاری کشیدگی میں کمی لانے کے لیے سکیورٹی سطح پر بات چیت اور رابطے جاری رکھنے کا اعلان

اتوار مئی 12:10

مصر کا اسرائیل سے رابطہ، القدس میں کشیدگی کم کرنے پر زور
قاہرہ(اُردو پوائنٹ اخبارتازہ ترین - این این آئی۔ 09 مئی2021ء) مصر نے اسرائیل کے ساتھ سکیورٹی سطح پر رابطہ کرکے مقبوضہ بیت المقدس میں جاری کشیدگی اور فلسطینیوں کے گھروں کی غیر قانونی مسماری روکنے پر زور دیا ہے۔میڈیارپورٹس کے مطابق ذرائع نے بتایاکہ مصری حکومت نے اسرائیل پر زور دیا کہ وہ موجودہ حالات کے پیش نظر القدس میں یہودی آباد کاری، توسیع پسندی اور فلسطینیوں کے گھروں کی غیر قانونی مسماری روکے ورنہ فلسطین میں ایک نئی تحریک انتفاضہ شروع ہو سکتی ہے،ذرائع کا کہنا تھا کہ مصری سکیورٹی حکام نے فلسطینی تحریکوں پر بھی زور دیا ہے کہ وہ موجودہ کشیدگی میں کمی لانے کیلیے اقدامات کریں،مصر نے بیت المقدس میں جاری کشیدگی میں کمی لانے کے لیے سکیورٹی سطح پر بات چیت اور رابطے جاری رکھنے کا اعلان کیا ۔

(جاری ہے)

مصر وزارت خارجہ نے ایک بیان میں مسجد اقصی میں فلسطینی نمازیوں پر اسرائیلی فوج کے ہونے والے حملوں اور الشیخ جراح میں فلسطینی مظاہرین کیخلاف کریک ڈان کی شدید مذمت کرتے ہوئے اسرائیل پر زور دیا کہ وہ نہتے فلسطینیوں کے خلاف طاقت کے استعمال کے مکروہ ہتھکنڈے بند کرے۔وزارت خارجہ کے ترجمان احمد حافظ نے ایک بیان میں کہا کہ مشرقی بیت المقدس میں فلسطینیوں کے خلاف اسرائیلی فوج کے اقدامات ناقابل قبول ہیں۔ مصر برادر فلسطینی قوم کے آئینی اور قانونی حقوق کی حمایت جاری رکھے گا اور فلسطینیوں کے خلاف اسرائیل کے طاقت کے استعمال کی مخالفت کرتا رہے گا۔