وفاقی بجٹ مثبت اور عوام دوست ہو گا

اس مرتبہ کورونا کی وجہ سے آ ئی ایم ایف کا دبائو نہیں ہے اس لئے بجٹ میں بھی وہ سختی نظر نہیں آ ئے گی۔ ماہرین معاشی امور

سمیرا فقیرحسین جمعہ 11 جون 2021 10:46

اسلام آباد (اُردو پوائںٹ تازہ ترین اخبار۔ 11 جون 2021ء) : ماہرین معاشی امور نے وفاقی بجٹ 22-2021ء سے متعلق عوام کو خوشخبری سناتے ہوئے کہا کہ وفاقی بجٹ مثبت اور عوام دوست ہو گا۔ نجی ٹی وی چینل سے بات کرتے ہوئے ماہرین معاشی امور کا کہنا تھا کہ اس مرتبہ کورونا کی وجہ سے آ ئی ایم ایف کا دبائو نہیں ہے اس لئے بجٹ میں بھی وہ سختی نظر نہیں آ ئے گی، حکومت جو بجٹ پیش کرنے جا رہی ہے یہ ایک مثبت اور عوام دوست بجٹ ہو گا ۔

معروف معاشی ماہر ڈاکٹر سلمان شاہ نے کہا کہ حکومت نے جو گروتھ ریٹ کا ہدف مقرر کیا وہ اس کو بآسانی حاصل کر لے گی ، حکومت اس بجٹ میں آ ئی ٹی ، زراعت اور مینو فیکچرنگ کے بہت سے پروگرامز لے کر آ رہی ہے ، بجٹ میں انویسٹرز کی پروموشن اور سٹاک مارکیٹ کیلئے خصوصی مراعات ہو ں گی ۔

(جاری ہے)

جبکہ وفاقی بجٹ 22-2021ء سے متعلق بات کرتے ہوئے معروف تجزیہ کار حسن عسکری نے کہا کہ اگر کورونا کنٹرول میں رہتا ہے تو اگلے مالی سال کے لیے ٹارگٹ حاصل کر لئے جائیں گے اور اگر معاملات بگڑ گئے تو پھر معیشت کو شدید نقصان پہنچنے کا اندیشہ ہے ، بجٹ میں تنخواہیں بڑھیں گی باقی روٹین کا بجٹ ہو گا ،امید ہے کہ حکومت نئے ٹیکس نہیں لگائے گی اور عوام کو اس طرح سے ریلیف دیا جا سکتا ہے ۔

معروف معاشی تجزیہ کار عابد سلہری نے کہا کہ حکومت جو بجٹ پیش کرنے جا رہی ہے وہ ایک متوازن بجٹ ہو گا جو اہداف حکومت کی جانب سے مقرر کئے گئے ہیں یہ اہداف کوئی مشکل نہیں ،مشکل حالات میں حکومت گروتھ ریٹ کو 4 فیصد تک لے گئی ہے ، اگر حالیہ بجٹ میں عوام کے لیے کوئی ریلیف نہیں ہو ا تو مشکلات بھی نہیں ہوں گی ۔ خیال رہے کہ مالی سال 22-2021ء کا وفاقی بجٹ آج پیش ہو گا۔ وفاقی بجٹ کا مجموعی 8000 ارب روپے، خسارہ 3050 ارب ر وپے ہوگا۔ ٹیکس آمدن کا ہدف 5820 ارب اور نان ٹیکس آمدن کا ہدف 1420 ارب روپے مقرر کیا گیا ہے۔ سرکاری ملازمین کی تنخواہوں اور پنشن میں 15 فیصد اضافہ متوقع ہے۔