شہزادہ چارلس اور ڈیانا کی شادی کے کیک کا ٹکڑا نیلامی کیلئے تیار

کیک ملکہ کی والدہ کے گھر والوں میں سے ایک فرد کو دیا گیا تھا جنہوں نے اسے آج تک محفوظ رکھاہواہے،رپورٹ

جمعرات 29 جولائی 2021 16:10

شہزادہ چارلس اور ڈیانا کی شادی کے کیک کا ٹکڑا نیلامی کیلئے تیار

لندن(اُردو پوائنٹ اخبارتازہ ترین - این این آئی۔ 29 جولائی2021ء) برطانوی شہزادہ چارلس اور لیڈی ڈیانا اسپینسر کی شادی کے 40 سال پرانے کیک کا ٹکڑا نیلامی کے لیے تیار ہے۔برطانوی نشریاتی ادارے کی رپورٹ کے مطابق شہزادہ چارلس اور لیڈی ڈیانا کی شادی کے کیک کی نیلامی کی رقم 500 تک ہوسکتی ہے۔رپورٹ کے مطابق گلسٹر شائر کے ڈومینک ونٹر اوکشنیرز سے تعلق رکھنے والے کرس ایلبری نے اس کیک کے ٹکرے کے بارے میں بتاتے ہوئے کہا کہ یہ بالکل اچھی حالت میں ہے لیکن ہم اسے کھانے کا مشورہ نہیں دیتے ۔

رپورٹ میں بتایا گیا کہ یہ کیک ملکہ کی والدہ کے گھر والوں میں سے ایک فرد کو دیا گیا تھا جنہوں نے اسے آج تک محفوظ رکھا۔ اسمتھ نے اسے پرانے پھولوں کے کیک ٹن میں رکھا اور ہاتھ سے بنے ہوئے لیبل سے اسے ٹیپ کیا جس پر لکھا ہوا کہ شہزادہ چارلس اور شہزادی ڈیانا کی شادی کے کیک کوخیال سے رکھیں۔

(جاری ہے)

رپورٹ میں یہ بھی بتایا گیا کہ اس کیک کی نیلامی 11 اگست کو ہوگی۔یاد رہے کہ شہزادہ چارلس اور لیڈی ڈیانا نے 29 جولائی 1981 کو سینٹ پالز کیتھیڈرل میں شادی کی تھی، ایک دوسرے سے علیحدگی اختیار کرنے سے پہلے اس شاہی جوڑے کے ہاں دو بیٹے شہزادہ ولیم اور شہزادہ ہیری پیدا ہوئے تھے جبکہ طلاق کے ایک سال بعد 1997 میں، پیرس میں ایک المناک حادثے میں شہزادی ڈیانا کا انتقال ہوگیا تھا۔