شاہ محمود قریشی کی آسٹریا کے وزیر خارجہ سے ملاقات ،دوطرفہ تعلقات اور باہمی دلچسپی کے امورپر گفتگو

پاکستان اور آسٹریا کے مابین اگلے دو طرفہ سیاسی مشاورتی اجلاس کے جلد انعقاد کے متمنی ہیں، شاہ محمود قریشی

جمعرات 23 ستمبر 2021 14:02

شاہ محمود قریشی کی آسٹریا کے وزیر خارجہ سے ملاقات ،دوطرفہ تعلقات اور ..

نیویارک (اُردو پوائنٹ اخبارتازہ ترین - این این آئی۔ 23 ستمبر2021ء) وزیر خارجہ مخدوم شاہ محمود قریشی نے نیویارک میں جاری اقوام متحدہ جنرل اسمبلی کے چھہترویں اجلاس کے موقع پر آسٹریا کے وزیر خارجہ الیگزینڈر شیلنبرگ کے ساتھ ملاقات کی جس میں دو طرفہ تعلقات اور باہمی دلچسپی کے کثیر الجہتی شعبوں میں تعاون کے فروغ پر تبادلہ خیال کیا گیا ۔ شاہ محمود قریشی نے کہاکہ پاکستان، آسٹریا کو یورپی یونین کا ایک اہم ملک گردانتے ہوئے آسٹریا کے ساتھ دو طرفہ تعلقات کع خصوصی اہمیت دیتا ہے۔

انہوںنے کہاکہ پاکستان اور آسٹریا کے درمیان، تجارت، سرمایہ کاری، ماحولیات، صحت، قابلِ تجدید توانائی ،آبی وسائل، زراعت، سیاحت اور ٹیکنالوجی کے شعبوں میں دو طرفہ تعاون بڑھانے کے وسیع مواقع موجود ہیں۔

(جاری ہے)

انہوںنے کہاکہ ہم پاکستان اور آسٹریا کے مابین اگلے دو طرفہ سیاسی مشاورتی اجلاس کے جلد انعقاد کے متمنی ہیں۔ انہوںنے کہاکہ پاکستان میں سیکورٹی کی بہتر صورت حال اور کاروباری سہولیات فراہم کرنے کے حوالے سے پاکستان کی عالمی درجہ بندی میں بہتری سے پاکستان میں سرمایہ کاری کے امکانات میں اضافہ ہوا ہے۔

انہوںنے کہاکہ آسٹرین کاروباری حضرات /کمپنیاں، ہماری حکومت کی ’’کاروبار دوست پالیسیوں‘‘سے فائدہ اٹھاتے ہوئے پاکستان میں سرمایہ کاری کر کے بہترین منافع کما سکتی ہیں، وزیر خارجہ نے آسٹرین ہم منصب کو دورہ پاکستان کی دعوت کا اعادہ کیا۔