علامہ اقبال انٹرنیشنل ایئرپورٹ کا فلائٹ آپریشن متاثر ہونے کا خدشہ

ایئرپورٹ کے مرکزی رن وے پر مرمت کا کام ابھی تک مکمل نہیں ہوسکا ، سیکنڈری رن وے پر دھند میں طیاروں کی لینڈنگ اور ٹیک آف کیلئے استعمال ہونے والا کیٹ آئی تھری سسٹم موجود نہیں

ساجد علی اتوار 21 نومبر 2021 16:00

علامہ اقبال انٹرنیشنل ایئرپورٹ کا فلائٹ آپریشن متاثر ہونے کا خدشہ

لاہور ( اُردو پوائنٹ اخبارتازہ ترین ۔ 21 نومبر 2021ء ) صوبہ پنجاب کے دارالحکومت لاہور کے علامہ اقبال انٹرنیشنل ایئرپورٹ کا فلائٹ آپریشن متاثر ہونے کا خدشہ ظاہر کردیا گیا ، ایئرپورٹ کے مرکزی رن وے پر مرمت کا کام ابھی تک مکمل نہیں ہوسکا ، سیکنڈری رن وے پر دھند میں طیاروں کی لینڈنگ اور ٹیک آف کیلئے استعمال ہونے والا کیٹ آئی تھری سسٹم موجود نہیں ہے ۔

اے آر وائی نیوز کی رپورت میں بتایا گیا ہے کہ علامہ اقبال انٹر نیشنل ایئرپورٹ کے مرکزی رن وے کا کام تاحال مکمل نہ ہونے کی وجہ سے سردیوں میں فلائٹ آپریشن متاثر ہونے کا خدشہ ہے ، اس وقت ایئرپورٹ کے سیکنڈری رن وے 36 ایل کو متبادل کے طور پر استعمال کیا جارہا ہے کیوں کہ لاہور ایئرپورٹ کے مرکزی رن وے ابھی تک مکمل نہیں ہوسکا جب کہ مرمت کا یہ کام ڈیڑھ سال میں مکمل ہونا تھا ۔

(جاری ہے)

بتایا گیا ہے کہ ایئرپورٹ کے سیکنڈری رن وے پر دھند میں طیاروں کی لینڈنگ اور ٹیک آف کیلئے استعمال ہونے والا کیٹ آئی تھری سسٹم موجود نہیں ہے ، آئی ایل ایس سسٹم نہ ہونے سے طیارے شدید دھند میں لاہور ایئرپورٹ پر لینڈنگ نہیں کرسکیں گے ، جس کے باعث سردیوں میں فلائٹ آپریشن متاثر ہونے کا خدشہ ہے جب کہ مرکزی رن وے پر مرمت کا کام ہونے کی وجہ سے ایئرپورٹ پر لانگ رینج اور وزنی طیاروں کی لینڈنگ کی بھی اجازت نہیں ہے ۔

اس حوالے سے ایئرپورٹ انتظامیہ نے اپنا موقف دیتے ہوئے کہا کہ مرکزی رن وے کی تعمیرات کا کام تیزی سے جاری ہے، مرکزی رن وے کی مرمت سے متعلق تمام ایئرلائنز کو آگاہ کردیا ہے اور ہدایت کی گئی ہے کہ سردی اور دھند کی وجہ سے پروازوں کے شیڈول میں تبدیلی کی جائے ۔