پنجاب کی جعلی وزیراعلیٰ کو اپنے بیان پر معافی مانگنی چاہیے، سہیل آفریدی

ڈی جی آئی ایس پی آر صاحب! آپ تو کہتے تھے کہ بھارت ہمارا دشمن ہے، جس کو آپ نے جتوایا وہ کہتے ہیں کہ ہمیں بھارت سے کوئی خطرہ نہیں، تو ہمیں بتایا جائے وہ صحیح کہتے ہیں یا یہ صحیح کہتے ہیں؟ حیدرآباد میں خطاب

ساجد علی اتوار 6 ستمبر 2026 20:45

پنجاب کی جعلی وزیراعلیٰ کو اپنے بیان پر معافی مانگنی چاہیے، سہیل آفریدی

حیدرآباد (اُردو پوائنٹ اخبارتازہ ترین۔ 06 ستمبر 2026ء) وزیراعلیٰ خیبر پختونخواہ محمد سہیل آفریدی نے کہا ہے کہ پنجاب کی جعلی وزیراعلیٰ نے بیان دیا ہے تو حیدر آباد والو مجھے بتاؤ کیا آپ دہشتگرد ہو؟ اس وزیراعلیٰ کو اپنے بیان پر معافی مانگنی چاہیے۔ تفصیلات کے مطابق سٹریٹ موومنٹ کے سلسلے میں حیدرآباد آمد کے موقع پر پرجوش کارکنان کے اجتماع سے خطاب کرتے ہوئے سہیل آفریدی نے کہا کہ حیدرآباد میں پی ٹی آئی کے ووٹ بینک کو بزورِ طاقت اور دھاندلی کے ذریعے چرایا گیا ہے، یہاں ہمارے مینڈیٹ پر کھلم کھلا ڈاکہ ڈالا گیا ہے، حیدرآباد کا ہر وہ ایم پی اے اور ایم این اے جو تحریک انصاف کے پلیٹ فارم سے نہیں جیتا، وہ چور، ڈاکو اور لٹیرا ہے۔

یہاں ہمارے مینڈیٹ پر ڈاکہ ڈالا گیا ہے۔ حیدر آباد کا ہر وہ ایم پی اے اور ایم این اے جو تحریک انصاف سے نہیں ہے وہ چور ہے، ڈاکو ہے اور لٹیرا ہے۔ کل پنجاب کی جعلی وزیر اعلیٰ نے بیان دیا ہے تو حیدر آباد والو مجھے بتاؤ کیا آپ دہشتگرد ہو؟ اُس وزیر اعلیٰ کو اپنے بیان پر معافی مانگنی… pic.twitter.com/fEdZwWj6TE
— Rizwan Ghilzai (Remembering Arshad Sharif) (@rizwanghilzai) September 6, 2026

وزیراعلیٰ خیبر پختونخواہ نے پنجاب کی وزیراعلیٰ مریم نواز کے حالیہ بیانات پر سخت برہمی کا اظہار کیا اور حیدرآباد کے شہریوں کے سامنے سوالات رکھے، انہوں نے حیدرآباد کے عوام سے پوچھا کہ کل پنجاب کی جعلی وزیر اعلیٰ نے جو بیان دیا ہے، اس پر مجھے بتاؤ حیدرآباد والو! کیا آپ دہشت گرد ہو؟ وزیراعلیٰ پنجاب کو اپنے اس غیر ذمہ دارانہ بیان پر دیگر صوبوں کے عوام سے فوری طور پر معافی مانگنی چاہیے۔

(جاری ہے)

سہیل آفریدی نے عسکری حکام کو مخاطب کرتے ہوئے کہا کہ ڈی جی آئی ایس پی آر صاحب! آپ تو فرماتے تھے کہ بھارت ہمارا ازلی دشمن ہے، لیکن جن لوگوں کو آپ نے جتوایا ہے، وہ کہتے ہیں کہ ہمیں بھارت سے کوئی خطرہ نہیں ہے، قوم کو بتایا جائے کہ آخر کون سچا ہے؟ فوج کا ادارہ یا وہ حکمران جن کے مطابق بھارت سے کوئی خطرہ نہیں؟ جو لوگ بھارت کو خطرہ نہیں مانتے، دراصل ان کے تمام تر ذاتی اور کاروباری مفادات اور کاروبار انڈیا میں قائم ہیں۔