فیصل آباد: خواتین کو بے لباس کرنے کا معاملہ، ایف آئی آر میں غلط شہری کا نمبر ڈالے جانے کا انکشاف

بدھ 8 دسمبر 2021 23:22

جڑانوالہ (اُردو پوائنٹ اخبارتازہ ترین - آن لائن۔ 08 دسمبر2021ء) تھانہ ملت ٹاؤن کی حدود میں خواتین پر تشدد اور انہیں مبینہ طور پر بے لباس کرنے کے معاملے کی ایف آئی آر میں غلط شہری کا نمبر ڈالے جانے کا انکشاف ہوا ہے۔ رابطہ کرنے پر شہری نے دعویٰ کیا کہ کام سے چوکی گیا تھا، پولیس نے ایف آئی آر پر میرا نمبر لکھ دیا، متاثرہ خواتین نے خود کو رشیدآباد کی رہائشی بتایا اور میرا تعلق بھی رشید آباد سے ہے۔

(جاری ہے)

شہری کا کہنا تھا کہ خواتین کو کبھی اس علاقے میں نہیں دیکھا، پولیس کو بتایا بھی کہ خواتین کو نہیں جانتا لیکن پھربھی میرا نمبر ایف آئی آر پر درج کر دیا۔دوسری جانب اس حوالے سے پولیس کا مؤقف ہے کہ درخواست کے ساتھ جو نمبر دیا گیا وہی ایف آئی آر پر درج کیا گیا تھا۔خیال رہے کہ گزشتہ روز فیصل آباد کے ملت ٹاؤن میں 4 خواتین پر تشدد اور انہیں بے لباس کرنے کی ویڈیو منظر عام پر آئی تھی، اس کیس میں اسٹور کے مالک سمیت 3 افراد کو گرفتار کیا جا چکا ہے۔