متحدہ عرب امارات ؛ 2 غیر ملکیوں کو واٹس ایپ پر منشیات فروخت کرنے پر سزائے موت

ابو ظہبی ( اُردو پوائنٹ تازہ ترین اخبار ۔ 04 جنوری 2022ء ) متحدہ عرب امارات میں 2 غیر ملکیوں کو واٹس ایپ پر منشیات فروخت کرنے پر سزائے موت سنادی گئی۔ اماراتی میڈیا کے مطابق ابوظہبی کی فوجداری عدالت نے دو فلپائنی شہریوں کو منشیات اور سائیکو ٹراپک اشیاء رکھنے اور اس کا کاروبار کرنے کے جرم میں سزائے موت سنائی ہے اور ضبط شدہ مصنوعات کو تلف کرنے ، ٹیلی فون سیٹ اور کمیشن میں استعمال ہونے والی تمام اشیاء اور منشیات کی اسمگلنگ سے حاصل ہونے والی آمدنی کو بھی ضبط کرنے کا حکم دیا ہے۔

بتایا گیا ہے کہ دونوں ملزمان رقم کے عوض بیرون ملک سے کام کرنے والے منشیات فروشوں کے اکاؤنٹس کے لیے منشیات اور سائیکو ٹراپک اشیاء کی مجرمانہ سرگرمیوں میں ملوث تھے ، جس کے لیے دونوں مجرموں کو منشیات کی بڑی مقدار ملی تھی جو پہلے سے غیر آباد جگہوں پر جمع کرائی گئی تھی جن کے لوکیشن کوآرڈینیٹ ان کو جمع کرنے کے لیے بتائے گئے ، اس کے بعد پروڈکٹس کو ان جگہوں پر ترتیب دے کر تقسیم کیا گیا ، کوآرڈینیٹ اور تصاویر ڈیلر کو منتقل کی گئیں ، جس نے انہیں منشیات کے عادی افراد کو بھیج دیا جو واٹس ایپ کے ذریعے بات چیت کرکے منشیات حاصل کرنا چاہتے تھے۔

(جاری ہے)

پولیس کی تفتیش نے شواہد پیش کیے اور کیس ابوظہبی پبلک پراسیکیوشن کو بھیج دیا گیا جس کے بعد ملزمان کی گرفتاری اور ان کے گھروں کی تلاشی کے لیے وارنٹ جاری کیے گئے ، پولیس فورس نے ان کی رہائش گاہوں کی تلاشی کے دوران ایک مشکوک کرسٹلائن مادہ پایا جو تجزیہ کے بعد ایک ممنوعہ سائیکو ٹراپک مادہ ثابت ہوا ، پولیس کو وہ فون بھی ملے جو دونوں ملزمان نے سوشل میڈیا کے ذریعے منشیات فروخت کرنے کے لیے استعمال کیے تھے۔