وزیراعلیٰ بلوچستان میر عبدالقدوس بزنجو سے پریس کلب گوادر کے ایک وفد کی ملاقات

گوادر کی ترقی اور ترقیاتی عمل میں مقامی آبادی کی مشاورت کا حصول ہماری حکومت کی ترجیحاتی پالیسی کا حصہ ہے مقامی صحافی گوادر کے حقیقی مسائل اجاگر کریں ،وزیر اعلیٰ

ہفتہ 22 جنوری 2022 16:54

گوادر (اُردو پوائنٹ اخبارتازہ ترین - این این آئی۔ 22 جنوری2022ء) وزیراعلیٰ بلوچستان میر عبدالقدوس بزنجو سے پریس کلب گوادر کے ایک وفد نے رکن صوبائی اسمبلی میر حمل کلمتی کی سربراہی میں ملاقات کی ۔وفد نے وزیر اعلی بلوچستان کو پریس کلب کے معاملات اور صحافتی امور سے متعلق مسائل سے آگاہ کیا۔

(جاری ہے)

وفد نے وزیر اعلی بلوچستان کو شہر کے ناقص سیوریج اور ڈرینیج لائنوں کی وجہ سے شہریوں کو درپیش مسائل، اسکولوں اور کالجز میں ٹیچرز کی کمی کے علاوہ گرلز کالج جیونی کے اسٹاف کی قلیل تنخواؤں سے متعلق بھی تفصیلی بریفنگ دی وفد سے بات چیت کرتے ہوئے وزیر اعلیٰ نے کہا کہ گوادر کی ترقی اور ترقیاتی عمل میں مقامی آبادی کی مشاورت کا حصول ہماری حکومت کی ترجیحاتی پالیسی کا حصہ ہے مقامی صحافی گوادر کے حقیقی مسائل اجاگر کریں تاکہ حکومت کی بھی رہنمائی ہو اور مسائل کے حل میں مدد مل سکے وزیراعلیٰ نے کہا کہ حکومت گوادر پریس کلب کو ضروری سہولیات فراہم کریگی انہوں نے کہا کہ محکمہ اطلاعات گوادر کو جدید خطوط پر استوار کرنے کے لیے بھی اقدامات کیے جارہے ہیں اس موقع پر چیف سیکریٹری بلوچستان مطہر نیاز رانا ڈپٹی کمشنر گوادر کپٹن ریٹائرڈ جمیل احمد محکمہ اطلاعات گوادر کے اسسٹنٹ ڈائریکٹر عبدالوھاب بلوچ بھی موجود تھے۔