نئی دہلی کے سکولوں میں بھی حجاب پر پابندی لگا دی گئی

نئی دہلی (اُردو پوائنٹ اخبارتازہ ترین - این این آئی۔ 26 فروری2022ء) کرناٹک کے بعد بھارتی دارالحکومت نئی دہلی کی جنوبی میونسپل کمیٹی نے نوٹس کے ذریعے طالبات کو صرف اسکول ڈریس میں ہی داخلہ دینے کا حکم دیا ہے۔بھارتی میڈیا کے مطابق جنوبی دہلی کی میونسپل کارپوریشن کی چئیرمین نکتا شرما نے نوٹس جاری کرتے ہوئے کہا کہ صرف اسکول ڈریس میں ہی بچوں کو اسکوم میں داخلہ ملے گا۔

(جاری ہے)

میونسپل کارپوریشن کی چئیرمین نکتا شرما نے مزید کہا کہ کسی بھی مذہبی شناخت کے کپڑے پہن کر اسکول آنے کی پابندی ہے، بچوں کے سرپرست اپنے بچوں کو صرف اسکول ڈریس میں ہی اسکول بھیجیں۔نکتا شرما کے جاری کردہ نوٹس میں کہا گیا کہ یہ دیکھا گیا ہے کہ کئی والدین اپنے بچوں کو مذہبی کپڑوں میں اسکولوں میں بھیج رہے ہیں، یہ مناسب نہیں ہے۔ بچے یونیفارم میں بہت خوبصورت نظر آتے ہیں،نوٹس کے مطابق جنوبی دہلی میونسپل کارپوریشن وقت وقت پر یونیفارم کے رنگ میں تبدیلی بھی کرتا رہتا ہے۔

نوٹس میں یہ بھی لکھا کہ اسکولوں میں یونیفارم اس لئے نافذ کئے جاتے ہیں تاکہ بچوں میں آپس میں ایک دوسرے کے تئیں امیر غریب کو لے کر احساس کمتری کا جذبہ پیدا نہ ہو۔ بچوں کے اندر ایک ہی یونیفارم پہننا ضروری ہے تاکہ عدم مساوات کا احساس نہ ہو۔